Lo divendres 21 de març e lo dissabte 22 de març passats, se tenguèt las 10as Jornadas de l’Immersion del costat de Carcassona. Aital, cada dos ans, los sièis rets immersius, Calandreta (Occitània), ABCM (Alsàcia), Diwan (Bretanha), Seaska (Bascoat), Bressola (Catalonha), e Scola Corsa (Corsega) se recampan per desvolopar una tematica causida a l’entorn de presentacions scientificas e de testimoniatges. Lo subjècte d’ongan partissiá de la decision curiosa del 21 de mai de 2021 del Conselh Constitucional francés a prepaus de l’ensenhament immersiu:

“L’ensenhament immersiu d’una lenga regionala es un metòde que se limita pas a ensenhar aquela lenga mas consistís a l’utilizar coma lenga principala d‘ensenhament e coma lenga de comunicacion dins l’establiment.” (Decision n° 2021-818 DC de 21 de mai de 2021 del Conselh Constitucional)

En qualques mots, comprenèm mièlhs la logica installada dins l’ensenhament e las resultas marridas que ne seguisson en matèria d’aprendissatge de las lengas en França. Estudiar una lenga pòt èsser interessant a la condicion de la parlar pas! Aquel rasonament s’amerita d’èsser publicitat, tant es simptomatic de la volontat de França de daissar lo francés en posicion egemonica. Aquò dit, las doas jornadas faguèron justament la pròva que l’ensenhament immersiu questiona e se questiona. Amb cada jorn, las presentacions de pasmens sièis recèrcas scientificas e de quatre testimoniatges, los participants mesurèron las avançadas coma l’inventivitat dels rets immersius per totjorn melhorar los dispositius. Amb gaireben 50 ans de practicas per d’unes, podèm rasonablament pensar que lo temps de l’experimentacion es acabat e que i a segurament cèrtas causas de considerar coma puslèu finas! En tot cas, los retorns dels participants foguèron a la nautor de las espèras. De notar que del temps de la primièra jornada Sénher Molac tenguèt a s’associar a la reflexion collectiva en videoconferéncia per faire lo punt a prepaus de la mèsa en òbra de la siá lei e de las oportunitats a agafar per la securizar encara mai dins los meses que venon.

Aquelas jornadas foguèron un temps fòrt per valorizar, e defendre, las nòstras lengas un còp de mai. L’ensemble de las comunicacions faràn l’objècte d’una publicacion del temps de l’annada avenidoira per contunhar de faire de l’ensenhament immersiu un vertadièr subjècte, d’aitan mai que demòra lo biais mai eficaç per dire de s’apoderar e de parlar una lenga.