Après lo succès de lor EP Canard-Isard en 2018, lo cantador tolosan Guillaume Lopez e l’acordeonista bigordan Clément Rousse tornan amb un novèl album, Thouxazun e Convits, que veirà la lutz lo 4 d’abril. Produch per Le CAMOM / Cie Guillaume Lopez e distribuït per Label IRFAN, l’òbra es un vertadièr omenatge a la diversitat musicala e al partatge artistic.

L’album recampa un repertòri de composicions pròprias amb d’influéncias gasconas e mediterranèas, sens desmembrar d’aires tradicionals panoccitans. Fidèls a l’esperit de las transmission e fusion musicalas, Lopez e Rousse an convidats onze artistas de tria per acompanhar lor viatge sonòr, dont Emilie Manescau, Anne-Lise Foy, Pierre Corbefin e Abdel Bouzbiba, que fan brilhar l’album amb lors voses, e tanben Camille Stimbre (violon), Noé Bazoge (violoncèla) e Thierry Roques (acordeon), entre tantes autres.

Per inaugurar aquesta novèla aventura, lo primièr single Valsa dels convits es estat causit per metre en valor la participacion d’aqueles musicians excepcionals. Lo clip, publicat sus YouTube lo 7 de març, pren la forma d’un jòc de pista per las carrièras de Tolosa, ont lo public es convidat a partir en cèrca dels artistas que fan del projècte una creacion collectiva e vibranta.