La quatrena edicion del Precís de gramatica d’occitan ancian, de Maurici Romieu e Andrieu Bianchi, es disponibla. Aquel manual de referéncia sus la fonetica istorica, la morfologia e la sintaxi de l’occitan medieval es estat revisat e agrandit per ofrir un esplech encara mai complet als estudiants e cercaires.

Lo cambiament mai vesidor d’aquela nòva edicion es l’usatge exclusiu de l’occitan. Totun, la novetat mai Importanta es l’incorporacion d’una larga seccion consagrada a la fonetica istorica, ont s’analisa de manièra menimosa l’evolucion dels fonèmas del latin fins a l’occitan ancian.

Los autors an concebuda l’òbra amb una clara vocacion pedagogica, en la fasent venir accessibla e de bon consultar. La tòca es de facultar l’aprendissatge e la compreneson de la lenga dels trobadors, en contribuissent aital a la difusion e la coneissença del patrimòni lingüistic occitan.

Maurici Romieu, nascut a Bessuèjols (Roergue) en 1943, foguèt professor d’occitan ancian e modèrne a l’Universitat de Pau. De son latz, Andrieu Bianchi, nascut a Maruèjols (Gavaudan) lo meteis an, ensenhèt l‘occitan al segondari e a l’Universitat de Bordèu Montanha. Totes dos an collaborat en divèrsas publicacions de referéncia sus la lenga occitana.

Lo libre, de 420 paginas, se pòt aquerir per 23 èuros dins las librariás e a travèrs del sit de l’editor: www.pub-editions.fr.