Segon Cornish Times,  la deputada laborista del sud-èst de Cornoalha, Anna Gelderd, presentèt a la fin de març passat al parlament britanic un projècte de lei per promòure l’ensenhament e la reconeissença de la lenga e del patrimòni cornics.

Aquela proposicion de lei a per tòca de garentir que lo kernewek, lenga que se considerava de per abans escantida mas que la vòl recobrar una part de la populacion, siá mai present dins las escòlas, l’administracion e l’espaci public d’aquel comtat d’Anglatèrra. Vòl tanben assegurar la preservacion d’aquel element fondamental de l’identitat d’aquela nacion celtica per las generacions venentas.

Un pas istoric per la lenga cornica

Dins son intervencion a la Cambra de las Comunas, Gelderd soslinhèt la riquesa istorica del cornic, qu’a mai de 4000 ans, e insistiguèt sus la necessitat de protegir la lenga coma part integranta de l’identitat de Cornoalha.

Malgrat sa reconeissença oficiala en 2002 coma lenga dicha regionala pel govèrn britanic, lo cornic benefícia pas de la meteissa proteccion que las autras lengas celticas de Grand Bretanha, coma lo galés o lo gaelic escocés.

Una lei per far viure la lenga

Lo projècte, que recep lo sosten transversal dels sèt deputats de Cornoalha, prevei:

• mai de preséncia del cornic dins los servicis publics, los panèls de senhalizacion e los mèdias, per normalizar son usatge

• mai de possibilitats d’aprene lo kernewek, amb de corses universitaris e de programas de formacion per adultes

• un bilingüisme que refortisca la coesion de la societat, en prenent exemple sul succès de l’integracion del galés en Galas e del gaelic en Escòcia.

Gelderd afortís que la reconeissença del cornic es pas una menaça per l’anglés, mas una oportunitat culturala e economica. De recèrcas mòstran que la promocion del patrimòni cornic pòt beneficiar a l’economia locala, particularament a travèrs del torisme cultural.

“La lenga e lo patrimòni cornics son essencials per ieu. Vòli que comprengam melhor nòstra istòria e qu’aumentem lo sentiment d’apertenéncia a Cornoalha”, çò apondèt la deputada.

Es lo primièr còp en 26 ans que lo cornic es mençonat a la Cambra de las Comunas. La proposicion de lei representa doncas un moment istoric per las lenga e cultura cornicas.

Demòra d’esperar, totun, los resultats concrets d’aquela iniciativa parlamentària.