La companhiá espanhòla Renfe ven d’anonciar l’anullacion de la ligason ferroviària entre Barcelona e Tolosa, çò rapòrta Vilaweb. Aquela anullacion es un còp dur per la connectivitat entre las doas vilas, d’aitan mai qu’aquela linha fasiá part dels projèctes de Renfe per afortir los escambis entre los estats espanhòl e francés.

Lo president de Renfe, Raül Blanco, aviá inicialament previst de lançar aquela ligason novèla tre aqueste mes d’abril, mas la companhiá a fach marcha arrièr a causa de las dificultats rescontradas en çò dels vesins franceses. Los retards amolonats dempuèi mai de tres ans dins l’expansion dels servicis de granda velocitat an obligat l’operator de reveire son estrategia. Mentre que la linha París-Barcelona representa un ais clau de connectivitat, los retards successius empachan encara Renfe d’aténher la capitala francesa abans 2029. “Fàcia a las dificultats e als retards successius rescontrats dins lo desplegament de son ofèrta de servicis de granda velocitat en França, Renfe a obèrt un procès d’analisi e de reflexion sus son estrategia globala dins aquel país”, çò expliquèron de fonts de la companhiá.

Segon El Economista, aqueles problèmas son ligats a las exigéncias estrictas de las autoritats regulatrises, qu’obligan d’omologar los trens e las operacions sus cada linha e traçat ont l’operator desira de circular. Demest las dificultats rescontradas, se tròba l’omologacion dels trens Avril, que compausan la sèria 106 de Renfe, per circular sus los camins de fèrre franceses. Lo retard de mai de dos ans dins la liurason d’aqueles trens, qu’a entraïnada una penalitat de 116 milions d’èuros pel constructor Talgo, es estat agreujat per de problèmas pendent los provaments necessaris per que los trens respècten la reglamentacion estricta en vigor dins l’estat francés.

En consequéncia, non solament Tolosa e Carcassona seràn pas pus dirèctament religadas a Barcelona, mas la frequéncia dels trens entre Perpinhan e lo sud dels Pirenèus serà tanben reducha. Per ara, Renfe s’acontenta de las ligasons Lion-Barcelona e Marselha-Madrid, çò que limita los escambis economics e las opcions de transpòrt pels abitants d’aquelas regions, e frena las relacions entre Occitània e Catalonha.