La rejoncha Cants tradicionaus en Coserans serà lèu disponibla e se presentarà oficialament lo divendres 26 d’abril a 20h30 dins la sala del mont Valièr a Ost (Coserans), pendent una cantada dobèrta a totes. Lo public serà convidat a venir escotar o cantar de cants pirenencs dins una velhada collectiva e conviviala.

L’autora de l’obratge, Estelle Galin Harris, comencèt son trabalh de recèrca e retranscripcion menat amb los cants transmeses per Guillaume Ané, dich Prince d’Aulús, que cantavan sa maire e sa grand a l’estiva e dins de moments clau de la vida vidanta. Puèi espandiguèt sas recèrcas a tota l’encontrada de Coserans.

La rejoncha es un libre de 300 paginas que recampa un ric repertòri de cants: comptinas e provèrbis, cants a dançar, d’amor, pastorèlas dialogadas, cants de trabalh e de mestièrs,  de la partença per l’armada, del maridatge, de la religion e de las fèstas calendàrias, e tanben de cants d’apertenéncia a un luòc. Una part es dedicada als instruments tradicionals del país.

Lo recuèlh inclutz l’avantdire d’Eric Fraj, qu’i afirma que “era transmission qu'é eth motor dera vida umana”, e es illustrat e paginat per Alice Traisnel. A mai, conten de ligams en còde QR per accedir a d’enregistraments en linha de certans coblets e refranhs interpretats per Michaël Bourry.

La recèrca de Galin Harris s’apuèja sus de nombrosas enquistas menadas del sègle XIX fins a uèi. De soslinhar que fòrça informators son de femnas, çò que demòstra que la tradicion cantada foguèt pas unicament masculina.

Estelle Galin Harris es tanplan autora del libre Ceux des montagnes (Le Pas d'oiseau, 2024), una ficcion que conta la vida de dètz personas pendent tres sègles e qu’explica la cultura e la vida d’aquel país montanhòl. L’autora es a traduire l’òbra en occitan de Coserans, Eths deras montanhas.

Per mai d’entresenhas: chants.en.couserans@gmail.com