Lo festenal Escambis festejarà sa desena edicion los 2, 3 e 4 de mai de 2025 dins los vilatges de Sant Seren, Sant Joan de la Ginèsta e Banas (Limarga e Segalar Carcinòl). Organizat per l’associacion Aquí l’Òc, lo festenal a la particularitat de s’adreiçar a un public larg: los que parlan occitan o non, los que son d’aicí o non... Tradicion e modernitat se conjugan per far descobrir e partejar nòstra cultura e nòstra lenga. Joves e mens joves se retròban dins de domenis tan variats coma lo cinèma, la musica, la dança, l’artisanat, la literatura, la poesia, l’istòria o lo conte.

Divendres 2 de mai, Sant Seren aculhirà una amassada escolara occitana a l’auditòri, ont los escolans presentaràn cants, danças e scenetas. De ser, Sant Joan de la Ginèsta vibrarà amb un concèrt-balèti dels grops Melick e Roule… et ferme derrière.

L'endeman dissabte, Sant Joan de la Ginèsta serà lo centre de l’activitat amb una fièra d’artisans e productors locals, d’exposicions, de jòcs, d’animacions de circ e de presentacions literàrias. A 11 oras, a la bibliotèca, i aurà la presentacion del darrièr libre de Fèliç Daval. En fin de tantòst, Christian Almerge e Eric Vogel ofriràn un concèrt a la glèisa, seguit de la remesa dels prèmis del concors d’escritura Pierre Brayac. La jornada se clavarà amb un repais seguit d’un balèti animat pels grops Caminarem e Cazellots.

Dimenge 4 de mai, la sala de las fèstas de Banas aculhirà una tièra de pèças bilinguas pel Teatreton de Banas, entre umor e vida vidanta, seguida de danças folcloricas amb Les Échos Limousins d’Argentat.

Tot lo programa se debanarà dins l’esperit de convivéncia, amb, entre d’autras causas, un estanquet e un taulièr de libres e de produches culturals occitans. Intradas de prètz modèst, repais sus plaça (reservacion obligatòria abans lo 30 d’abril) e una organizacion qu’encoratja lo partatge e la transmission culturala.

Trobaretz lo programa e mai d’entresenhas sul sit web del festenal e sus Facebook. Per mai d'informacion o per reservar vòstras plaças:

• Telefòn: +33 (0)6 73 62 64 63
• E-mail: asso.aquiloc@gmail.com