Aqueste dissabte 5 d’abril, a l’estadi de Narbona, la vesprada se dobriguèt sus la finala de la copa Nitard dels U19 entre St Estève-XIII Catalan e lo Tolosa Olimpic. Los Sang e Aur menèron 26-6, puèi 26-12 a la pausa. Sus la primièra ataca de represa, un ensag entamenava la remontada tolosana que se clavèt sus una victòria 48-36 dins una partida vodada a l’ataca e a la circulacion de la palma per las doas formacions. Tresen trofèu en seguida emportat pels occitans.

En finala de la copa Lòrd Derby, St Estève-XIII Catalan susprenguèt d’entrada los albigeses: dos ensages e doas penalitats lor permetián de menar 16-0 al cap d’un quart d’ora. Albi marquèt dos ensages abans la pausa: 10-16. Amb un ensag e doas penalitats, los tarneses prenián l’avantatge 18-16 a la represa, mas dos novèls ensages balhan la victòria als Sang e Aur: 26-18. Albi a prepausat un jòc tròp estequit per poder contrar la joinesa e lo vam catalans.

E ara, plaça al campionat fins a la finala del 25 de mai a Narbona. Pel compte de la vintena jornada, se jogaràn las partidas:

• dissabte 12 d’abril: un decisiu Vilanòva-Vilafranca per la darrièra plaça qualificativa; lo dèrbi Dragonets-Pià que se tendrà a Brutus; Tolosa-Carcassona; Albi-Limós

• dimenge 13: St Gaudenç/Lesinhan.

Los Dragons en mièja finala de la Cup

Divendres 4, a Brutus, los Dragons recebián Salford en quart de finala de la Cup. Los locals ganhèron 20-12 al tèrme d’una partida mestrejada mas laboriosa. Èra l’escasença per Sam Tomkins de jogar sa 400a partida de Superliga.

Los autres qualificats son: Leigh que ganha a Wakefield: 20-12; Hull KR empòrta lo dèrbi facia a Hull FC: 32-16. Warrington elimina St Helens 20-12.

Las mièjas finalas se jogaràn en Anglatèrra los 10 e 11 de mai. Los catalans rescontraràn Hull KR, e Warrington serà opausat a Leigh.

Aqueste dimenge 13, en Superliga, los catalans aniràn desfisar los Gigants d’Huddersfield abans de tornar trapar Salford a Brutus dissabte 19.

En Championship, lo Tolosa Olimpic jogarà aqueste dissabte cò de las Aglas de Sheffield.

NRL: primièras victòrias pels Dalfins e las Anguialas

Dijòus 3 d’abril, mercé a un ensag de darrièra minuta aprèp una relança dempuèi sos 20 mètres, Canberra batiá las Làmias: 24-20.

Divendres 4, lo dèrbi de Sydney vegèt la victòria dels Lapinons facia als Pols: 20-14. Novèla desfaita de Penrith que subís a domicili la lei dels Vaquièrs: 18-22.

Dissabte 5, avenián las primièras victòrias de la sason per las Anguialas: 23-22 fàcia als Dragons de Sant Jòrdi e pels Dalfins que van batre los Titans: 36-10. Los Cavals Fòls s’impausan fàcia als Tigres: 48-24.

Dimenge 6, la Tempèsta ganha cò de las Aglas de Mar 42-10 e los Dògols an totjorn pas perdut una partida e confirman lor primièra plaça per una victòria fàcia als Cavalièrs: 20-0.