Capitèt ben lo rescontre cultural e literari consagrat a las autoras occitanas tengut a Tolosa lo 8 de març passat a l’ocasion del Jorn Internacional de las Femnas.

La jornada comprenguèt una rica varietat de presentacions literàrias. Chantal Armagnac soslinhèt lo ròtle passiu reservat istoricament a las femnas amb un fragment de son libre sul pastèl. Anne-Pierre Darrées prepausèt qualques reflexions sus la marginalitat de la literatura femenina en occitan, del temps que Fabienne Vayrette se solidarizava amb Anna, una resistenta russa a la guèrra en Ucraïna. Cecília Chapduelh Interpretèt un poèma sus las inegalitats conjugalas, e Martine Boudet defendèt la dobertura del movement occitanista a d’autras culturas minorizadas endacòm mai.

La segonda part de l’eveniment se centrèt sus la solidaritat amb las femnas oprimidas dins lo Mond entièr. Béatrice Dillies saludèt lo ròtle de las femnas curdas dins la lucha contra l’autoproclamat Estat Islamic, mentre que Sabine Aussenac rendiá un omenatge a la poetessa alemanda Rose Ausländer. Elodie Loustau recitèt de poèmas consagrats a sa menina  malauta d'Alzheimer, e Estela Duval interpretèt un poèma musicalizat de la trobairitz  la Comtessa de Diá.

Enfin, un debat suls enjòcs de l’emancipacion femenina en Occitània foguèt moderat per Florence Ginisty, avocata e representanta de Convergéncia Occitana. Se soslinhèt lo fach qu'escriure en lenga minorizada es una forma d’universalitat que transcendís lo localisme. L'amassada se concluguèt amb un engatjament per espandir l’eveniment annadièr a d’autres mitans artistics e professionals.

Lo rescontre revendica non solament la visibilitat femenina dins lo movement occitanista, mas tanben promòu una cultura fondada sus l’empatia e l'integritat coma camin vèrs la patz e la democracia.

L’eveniment foguèt organizat per Convergéncia Occitana, la librariá La Tuta d’òc (IEO 31), Ràdio Occitània, Ràdio Ter, LoDiari, Jornalet e lo restaurant A Taula e divèrsas associacions coma Nos Conversations e Ucraïna en Occitània.

Aquel rescontre sorgís de la crida feminista publicada sus la plataforma Avenir Occitanisme, que revendica una representacion digna de las femnas dins lo movement occitanista e que se pòt cosignar en linha.