Lo collectiu RECLAM (Reconeissença e Categorizacion de las Lengas Minor(iz)adas) a lançat una convocacion de participacion pel collòqui internacional “Votz entenederas, lengas invizibilizadas?”, que se tendrà a l’Ostal de las Sciéncias de l’Òme de Bordèu del 17 al 19 de novembre de 2025.

Inspirat de l’apròchi de las universitats latinoamericanas, que meton en valor la votz de la societat civila, lo collòqui convida tant de cercaires coma d’actors non academics, valent a dire d’associacions engatjadas dins la reviudacion lingüistica, a presentar de proposicions e partejar d’experiéncias. Las cridas son disponiblas en sèt lengas: francés, espanhòl, portugués, anglés, basco, guaraní e occitan gascon.

Lo collòqui se vertebrarà a l’entorn de tres aisses tematics: la categorizacion de las lengas minorizadas, la transmission d’aquelas lengas e la produccion scientifica que las pren coma objècte d’estudi. S’i abordarà de questions coma lo drech lingüistic, las politicas educativas, la transmission familiala, lo ròtle de la militància o la relacion entre coneissença academica e comunautats lingüisticas.

Las proposicions se pòdon presentar fins al 13 d’abril de 2025 e an de comprene un resumit de 300 paraulas maximum almens en doas de las quatre lengas oficialas del collòqui (francés, portugués, espanhòl o anglés). Serà, pasmens, agradiu d’i apondre un resumit en una lenga minorizada.

Lo collectiu RECLAM es format de joves cercaires de las universitats de Bordèu Montanha e de São Paulo, escomesa per un espaci academic mai inclusiu e multilingüe, ont las lengas minorizadas sián pas solament una tòca d’estudi, mas tanben veïcul de pensada e transmission de coneissenças.

Per mai d’entresenhas podètz escriure a: comite.languesminorisees@gmail.com

• Crida a la participacion d’actors non academics

• Crida a la participacion de cercaires scientifics