Lo govèrn de Donald Trump compren las mesuras de proteccion del catalan, del basco e del galèc dins l’audiovisual coma una de las “barrièras al comèrci estrangièr” que justifican los dreches de doana impausats als produches europèus. Atal o ditz un rapòrt de 400 paginas publicadas pel Ministèri del Comèrci dels Estats Units, ont s’acusa qualques estats de l’Union Europèa, especialament Espanha, d’empedir l’accès del cinèma estatsunidenc a lors mercats.

Lo document denóncia que, dins l’estat espanhòl, per cada tres jorns que se projècta un filme non produch dins l’UE, ne cal projectar un de l’Union, e qu’aquela proporcion se redutz a cada quatre jorns se lo filme es en una lenga oficiala diferenta de l’espanhòl. Critica tanben que los catalògs de las plataformas ajan de comprene almens un 30% de contenguts de l’UE, e qu’almens la mitat sián en catalan, galèc, basco o d’autras lengas oficialas de l’estat. Per ara, es pas encara lo cas de l’occitan, e mai siá tanben lenga oficiala en Catalonha.

Repròcha tanben las subvencions a Airbus

Las mesuras lingüisticas son pas lo sol repròchi d’aquel rapòrt. Los Estats Units i acusan tanben las subvencions a Airbus e los retards dels pagaments de produches farmaceutics coma justificacion per aplicar, dempuèi lo 5 d’abril, de dreches de doana d’entre l’11% e lo 50% als produches europèus.

Quant als estats que concernisson Occitània, Itàlia e França son mai vulnerables als dreches de doana impausats per Trump pr’amor de lor dependéncia a las exportacions devèrs los Estats Units e de la concentracion dins de sectors fòrtament tocats pels dreches de doana. L’estat espanhòl a un bilanç comercial negatiu amb los Estats Units.