Washington a aquesta setmana volgut impausar los dreches de doana mai nauts de las darrièras cent annadas en provocant una granda agitacion dins los mercats e la paur d’una eventuala recession globala. Ça que la, lo president Donald Trump faguèt una virada inesperada dimècres: del temps qu’intensificava lo conflicte comercial amb China, reduguèt parcialament las tarifas als autres païses, çò que tranquillizèt los investidors.

Segon The Washington Post, la virada arribèt après las pressions de caps republicans e de govèrns estrangièrs, coma Soïssa, qu’avertiguèron Trump dels risques economics. De sorsas pròchas del president expliquèron que l’influencièt tanben l’ànsia dels mercats de valors e las criticas de certans òmes d’afars que senhalavan que totplen d’entrepresas talhavan de despensas per l’incertitud.

Trump defendèt sa decision en disent que se prenguèt “amb lo còr” e qu’èra necita per evitar un caos màger. Totun, lo cambiament estonèt quitament de nauts responsables de l’Ostal Blanc, que foguèron pas quitament assabentats del comunicat.

Lo secretari (ministre) del comèrci, Howard Lutnick, e lo secretari del tresaur, Scott Bessent, ajudèron a redigir l’anóncia, que se presentèt coma un succès estrategic. Pasmens, Peter Navarro, principal defensor dels dreches de doana durs, participèt pas a la decision, çò que supausa un cambiament dins los equilibris del poder al govèrn dels Estats Units.

Mentre que los mercats reagissián positivament, Trump assegurèt que sa tòca èra totjorn de reformar lo comèrci global, mas amb mai de pragmatisme.

De veire, totun, las reaccion e situacion de China, sus la quala se concentran de tarifas impressionantas a l’entorn del 100%.

“Me potonan lo cuol”

Mas Trump reconeis pas publicament aquelas pressions e assegura qu’es lo Mond entièr que l’a suplicat de negociar. Pendent un discors tengut al Comitat Nacional Republican, a Washington dimars de ser, Trump fanfaronèt. “Aqueles païses me telefònan. Me potonan lo cuol, crèban d’arribar a un acòrdi. «Se vos plai, se vos plai, Sénher, vos prègui d’arribar a un acòrdi, farai qué que siá, farai qué que siá, Sénher»“, çò diguèt en se trufant dels dirigents internacionals.

The 18 hours that changed Trump’s mind on trade https://t.co/J7roUYDSMl

— Matt Murray (@murraymatt) April 10, 2025