Emmanuel Macron anoncièt lo 9 d’abril passat que l’estat francés poiriá reconéisser l’existéncia d’un estat palestinian pendent una conferéncia internacionala a l’ÒNU, que se tendrà en junh, çò rapòrta Le Monde. Lo president francés, dins una entrevista sus France 5, soslinhèt qu’aquela reconeissença s’inscriuriá dins l’encastre d’un procès qu’auriá per mira d’instaurar una dinamica collectiva de patz a l’Orient Mejan. Segon el, la conferéncia, copresidida per l’estat francés e l’Arabia Saudita, poiriá tanben pervenir a la reconeissença d’Israèl per un certan nombre de païses. “Cal anar cap a una reconeissença [de l’estat palestinian] e doncas, dins los meses venents, i anarem”, çò declarèt.

La conferéncia internacionala de junh aurà per objectiu de promòure la solucion dels dos estats, una idèa refortida dempuèi la debuta del conflicte en Gaza en octòbre de 2023. A l’ora d’ara, près de 150 païses an ja reconegut l’estat palestinian. Dins l’Union Europèa, França demòra un dels païses que resistissián encara a la reconeissença de l’estat palestinian, als costats del Reialme Unit, d’Itàlia o d’Alemanha, qu’o an pas tanpauc fach. Pasmens, la solucion dels dos estats es encara regetada pel primièr ministre israelian, Benjamin Netanyahu, e son govèrn d’extrèma drecha.

Macron precisèt qu’aquel encaminament auriá per mira de “clarificar” la situacion e encoratgèt los païses que sostenon Palestina a reconéisser Israèl, en cas qu’encara aguèsson pas fach aquel pas. Evoquèt tanben la necessitat d’una “seguretat collectiva” per la region, per tal de luchar contra los païses que refusan de reconéisser Israèl, coma Iran.

Dins l’estat francès, aquela anóncia suscita de reaccions variadas. L’esquèrra e lo centre saludan aquela proposicion, la considerant coma una avançada cap a una solucion justa, mentre que l’extrèma drecha jutja aquela reconeissença de “prematura”. Lo vicepresident del Recampament Nacional, Sebastian Chenu, diguèt sus LCI que lo partit neofaissista es “favorable a dos estats”, mas segon el l’estat palestinian es uèi “adorsat a l’Hamas”. De son caire, l’èx-president socialista François Hollande apròva aquela iniciativa, en recordant que la reconeissença de Palestina, e mai simbolica, se deuriá acompanhar de mesuras concretas per melhorar la situacion en Gaza.