Lo dimars 8 d’abril passat, se tenguèt la jornada Paratge a Rabairac qu’amassèt 370 escolans del segond gra que seguisson l’opcion de lenga occitana dins lors establiments.

Coma cada an, l’agéncia culturala del departament de Dordonha-Peiregòrd organizèt un programa d’obradors pels escolans del segond gra que s’acabèt per una jornada de rescontre, d’escambis e de fèsta a Rabairac, vila del trobador Arnaut Danièl.

Après las intervencions del cantador Rodín arunan, lo programa Paratge se desvolzèt aquesta annada en tres formas: lo teatre, lo cant e la dança.

Los obradors d’iniciacion al teatre foguèron assegurats per Laurenç Labadie e son filh, Helio. Amb la collaboracion dels professors, prepausèron e metèron en scèna de peçòtas mai que mai amusantas que foguèron jogadas davant lo public escolar dins la matinada del dimars.

D’autres escolans aprenguèron de cants e de danças e las partegèron ambs los autres joves mercés a las intervencions de dos musicians del país: Gilles de Becdelièvre e Nicolas Peuch. Aquestes animèron lo balèti cantat que se tenguèt durant la tantossada d’aquela jornada plan rica e boleganta.

De notar que lo festenal Paratge es pas acabat e se contunharà per totes los publics lo 24 de mai a Bordelha (Peiregòrd Central) amb una tantossada d’omenatges a Marcela Delpastre, que se festeja ongan lo centenari de sa naissença, e una serada de danças e musica. Totes los eveniments prepausats seràn gratuits. Trobaretz mai d’entresenhas aicí.