Dins l'afar dels assistents parlamentaris europèus del Recampament Nacional (RN), sols dotze dels vint e cinc condemnats an causit de far apelacion, segon de fonts judiciàrias relevadas per RMC. Aquela chifra, reveladoira, aflaquís considerablament l'estrategia de defensa de Marine Le Pen e Louis Aliot, que contunhan de negar en blòc los faches.

La data limit per contestar la decision renduda a la fin de març expirava lo 10 d'abril passat a mièjanuèch. Tretze dels condemnats, principalament d'ancians assistents parlamentaris del partit d'extrèma drecha, an acceptada la decision de la justícia. Segon lo tribunal, aqueles èran remunerats amb de fonzes europèus tot en trabalhant en realitat pel partit dins l'estat francés, e non pels eurodeputats coma aquò foguèt estipulat dins lors contractes.

Lor decision rend definitivas lors condemnacions e marca una rompedura amb la linha defensiva comuna adoptada pendent lo primièr procès. En aquel temps, totes los acusats negavan l'existéncia d'un sistèma organizat qu'aguèsse per mira de desvirar de fonzes publics europèus. Aquela unitat se fend, metent en dificultat Le Pen e Aliot, dont l'estrategia repausa sus la contèsta de tota malversion estructurada. Recordem que Marine Le Pen, que se comparèt amb Martin Luther King, es ara per ara declarada inelegibla, çò qu’empacha automaticament una nòva candidatura a la presidenciala francesa.

Aquel retirament massís simplifica tanben la procedura: lo procès en apelacion, que concernirà pas qu'una dotzena de personas, deuriá èsser mai rapid. La cort d'apelacion de París prevei de dobrir las audiéncias a la debuta de 2026, amb una decision esperada a l'estiu de la meteissa annada.