Actualitats
La produccion d’un filme de Nicolas Vanier condemnada per la destruccion d’uòus de becaruts en Camarga
La societat Radar Films, productritz del filme Donne-moi des ailes, es estada condemnada per aver causat la destruccion de centenas d’uòus de flamencs ròses pendent lo filmatge en Camarga
Tèxte legit
L’11 d’abril passat, lo tribunal de Nimes condemnèt la societat Radar Films, productritz del filme Donne-moi des ailes de Nicolas Vanier, per la destruccion de 520 uòus de flamencs ròses en Camarga, çò rapòrta Reporterre. L’entrepresa a recebuda una emenda de 50 000 èuros per destruccion illegala d’uòus d’una espècia protegida, aital coma 2000 èuros per perturbacion volontària de la fauna.
Los faches remontan a junh de 2018, pendent lo filmatge. Dos ULM subrevolèron una colònia de flamencs ròses en plen periòde de covason, provocant la fugida dels becaruts. Dins lor panica, los aucèls destruguèron lors pròpris uòus, l’11,5 % de la reproduccion annadièra de la colònia. Los ULM (Ultraleugièrs Motorizats) son d’aeronaus plan leugièras e pichonas, concebudas per volar a bassa altitud.
Pendent lo procès en març, lo procuraire aviá requerida una emenda de fins a 100 000 èuros. Las pars civilas, dont la Liga per la Proteccion dels Aucèls (LPO, segon lo nom oficial francés), avián reclamats unes 600 000 èuros de damatges e interèsses.
Nicolas Vanier a contestada la decision, estimant que sols los pilòts son responsables. Deplora una sancion «plan injusta». «La produccion e ieu sèm estats victimas dins aqueste afar. La justícia a picat sus aquels qu’èran solvables», çò deplorèt. L’LPO, de son caire, planh un jutjament que minimiza las consequéncas ecologicas, e considèra de far apelacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Los responsables, son los autres. Tè, lo lampista, per exemple! O lo pilòt, perqué pas!
Encara un as de l'elicoptèr, coma l'Artús Bertrand.. Apuèi, te faràn la leiçon sus l'environament, en tot polluïssent e desrengant fauna e flòra.
Cal daissar de voler impressionar los que fan de grais en agachant la natura sus ecran. Que i aja de reportatges, va plan. Mas voler ne far totjorn mai, emai siá en afrabant la vida del campèstre, non!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari