Lo govèrn italian, de drecha dura e extrèma, de Giorgia Meloni a passat una novèla estapa dins la repression. Segon Basta, lo 4 d’abril passat foguèt adoptat un decret que permet d’ara enlà l’empresonament dels participants a d’accions de desobesissença civila. Aquel tèxt crèa de novèls delictes, coma lo de “resisténcia pasiva”, punissent d’accions coma lo blocatge d’estradas pendent de manifestacions amb de penas de fins a sièis ans de preson.

Dempuèi son arribada al poder en octòbre de 2022, Meloni a multiplicat las iniciativas controversiadas contra las libertats fondamentalas. En 2023, aviá ja fach adoptar un decret que limita la preséncia de las ONG umanitàrias dins las zònas de recèrca de migrants. En mai d’aquò, una circulara aviá temptat de retirar l’estatut parental de las maires non biologicas dins las familhas LGBT+. Lo decret sus la seguretat, totun modificat per amatigar cèrtas criticas, inclutz tanben de proteccions juridicas per las fòrças de l’òrdre, coma pels policièrs acusats de violéncias, que poiràn contunhar de trabalhar e mai se i a d’enquistas judiciàrias contra eles.

Aquel decret s’inspira del polemic projècte de lei de Seguretat Globala de 2023, blocat mantun mes a la Cambra dels Deputats e al Senat per de rasons budgetàrias. Pasmens, jos la pression del president de la Republica, Sergio Mattarella, d’unes dels articles mai controversiats son estats modificats. Aquela mesura novèla, que prevei una repression acrescuda dels activistas, a suscitat de tensions dins la coalicion de drecha. Lo projècte de lei inicial, portat pel ministre dels transpòrts Matteo Salvini (Liga, extrèma drecha), mirava principalament los militants ecologistas que s’opausan al projècte de linha TGV entre Lion e Turin. Concernissiá tanben los activistas de “darrièra generacion”, responsables de mantun blocatge d’estradas aquestas darrièras annadas. Malgrat de desacòrdis amb lo partit de Meloni (Fraires d’Itàlia, pòstfaissista) sus cèrtas mesuras pendent l’examen del tèxt al Parlament, Salvini presentèt aquel decret coma una victòria per son camp.