La Cort Suprèma del Reialme Unit estima que, segon la legislacion britanica, lo mot femna fa sonque referéncia al sèxe biologic e, per tant, exclutz las femnas transgenres. La decision, presa a l’unanimitat, met lo ponch final a un litigi entamenat per una associacion de femnas contràrias a la lei trans escocesa de 2018 que garentís la paritat dins los conselhs d’administracion dels organismes publics, çò rapòrta la BBC.

Los jutges considèran que la Lei d’Egalitat de 2010 emplega lo mot femna dins aquel sens, malgrat qu’o especifique pas explicitament. “Lo sens abitual d’aqueles tèrmes correspond a las caracteristicas biologicas que fan d’un individú un òme o una femna”, çò ditz la resolucion.

La senténcia l’an saludada las impulsoras del recors mas chepica fòrça las organizacions que defendon los dreches de las personas transes. Ça que la, lo jutge Patrick Hodge a avertit que la decision se deu pas interpretar coma la victòria d’un collectiu sus un autre e assegura que las personas transes son totjorn protegidas contra la discriminacion per rason de genre.