Lo retrach de Mahmod Ajjor[1], un dròlle palestinian de nòu ans mutilat après un atac israelian en Gaza, a ganhat lo prèmi World Press Photo 2025, que guierdona la melhora foto jornalistica de l’annada. La fotografia l’a facha la fotojornalista palestiniana Samar Abu Elouf e l’a publicada The New York Times. Lo retrach mòstra lo dròlle amb sos dos braces amputats e transmet lo drama personal e collectiu de la guèrra.

La jurada, presidida per Lucy Concicello, es estada sensibla al poder d’aquela fotografia de comunicar una istòria complèxa e umana. “Es un imatge discret que parla fòrt e clar, que conta l’istòria d’un mainatge, mas tanben d’una guèrra que son impacte afectarà mai d’una generacion”, çò estima la directritz executiva del prèmi, Joumana El Zein Khoury.

L’istòria de Mahmod

En març de 2024, del temps que fugissiá un atac israelian en Gaza, Mahmod foguèt nafrat. Alavetz, tornèt endarrièr per encoratjar sa familha a contunhar de caminar endavant, e a aquel moment una explosion li faguèt pèrdre los dos braces. La familha aguèt l’astre d’èsser evacuada en Qatar, ont lo gojat recebèt de suènhs medicals e ont aprenguèt a realizar d’activitats quotidianas amb los pès, coma jogar amb lo telefonet o dobrir de pòrtas.

Quant a la fotojornalista, Samar Abu Elouf, ela tanben capitèt d’èsser evacuada en Qatar qualques meses abans la tragèdia que la patiguèt l’enfant. Ara demòra a Al Dawha dins lo meteis complèxe que Mahmod. Aquí, ela a testimoniat d’autres gazauís nafrats qu’an pogut partir en cèrca de suènhs medicals.

Un rebat del drama de Gaza

Segon las donadas de l’ÒNU, Gaza a lo nombre mai naut del Mond d’enfants victimas d’amputacions, una chifra que met en evidéncia l’impacte desproporcionat de la guèrra sus la populacion infantila. La fotografia de Mahmod Ajjur ven aital un testimòni poderós del còst uman e del besonh urgent d’atencion e de solidaritat.

Lo guierdon del World Press Photo 2025 reconeis pas solament l’excelléncia artistica e jornalistica de Samar Abu Elouf, mas tanben cèrca d’atraire l’atencion internacionals sus las consequéncias umanitàrias del conflicte en Gaza, mai que mai suls mai vulnerables: los enfants.

“Los mainatges an pagat un prètz fòrça naut per las orrors qu’an viscudas, e Mahmod n’es un”, çò diguèt la fotografa al moment de recebre lo guierdon. “El perdèt sos braces dins un bombardament quand fugissiá amb sa familha, e sa vida es un desfís perque se pòt pas defendre e depend de sa maire, quitament per sos besonhs de basa.” La fotografa apondèt que trobava fòrça de manca sa familha e qu’esperava que lo prèmi serviriá “a ajudar a melhor comprene çò que se passa en Gaza”.