Los liceans de Josèp Savèrna de l’Isla de Baish e los de l’IES Narcís Xifra de Girona que viscón un moment de desbrumbar pas gràcias a un escambi Erasmus ric en descobèrtas centrat sus las lengas catalana e occitana. Organizat peus ensenhaires Marta Pasqual, Maria-Laura Veguèr e Nicolau Rei Bèthvéder, aqueth escambi permetoc aus joens de Catalonha e d’Occitània de partatjar lor vita vitanta deu 23 de març a l’11 d’abriu de 2025.

L’escambi debutèc a l’Isla de Baish, on los correspondents catalans estón arcuelhuts per las familhas autanlèu lor arribada a Tolosa, lo 24 de març. L’endedia, escolans partatgèn lo dejunar damb chocolatinas au licèu abans de s’integrar aus corses. Lo sejorn se ritmèc de visitas emblematicas: Blanhac damb los sits d’Airbus e d’Aeroscopia, la descobèrta deu patrimòni lislés damb l’Ostau Claudi Augèr e lo musèu campanari, o encara una jornada sancèra a Tolosa, deu Capitòli a l’Ostau d’Occitània, sens desbrumbar un passatge simbolic au Casal Català.

Lo punt d’òrgue estoc çampar la hèsta d’adiu, lo dijaus de ser, a l’ostau de vila de l’Isla de Baish. Una serada hestiva on familhas, escolans e ensenhaires s’amassèn a l’entorn de plats partatjats e de danças gasconas. Olivièr Berard inicièc los participants a la boha, afortissent atau los ligams culturaus entre los liceans.

L’endedia, es a Carcassona que los joens clavèn lor sejorn, damb una visita guidada en occitan per Alan Roch, vertadèr Merlin l’Encantaire de l’istòria catara.

Duas setmanas mès tard, deu 6 a l’11 d’abriu, estoc au torn deus liceans lisleses de descobrir Girona. Arcuelhuts damb benvolença, participèn a las classas deu licèu catalan en trabalhar sustot sus l’intelligéncia articifiala, abans de visitar Barcelona e lo sit modernista deSant Pau, o encara la Còsta Brava peu camin de ronda de S’Agaró. Una iniciacion aus castells damb los Marrecs de Salt merquèc los esperits, tot coma la tasta deus xuixos, pastisserias localas, après la recepcion oficiau a la maison comuna de Girona per Sergi Font e la visita de la Casa Masó.

Aqueth doble sejorn, mesclant patrimòni, lenga e amistat, hè pròva de l’arsec deus escambis europèus e deu ligam pregond entre culturas occitana e catalana. Una experiéncia enriquidora dont los nostes joens gardaràn longtemps lo sovénguer.

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jornalet.com.