S’anam viure un cambiament grandaràs dins la vida del XIII en Occitània e Catalonha? Lo president de l’FFR-XIII es a faire la virada cò dels clubs de Super-XIII e d’Elèit 2 per considerar un cambiament de calendièr: passar de la sason d’octòbre a mai a una sason de febrièr a octòbre en s’alinhant sul calendièr anglés. Seriá respondre al vòt dels australians que son a mand de prene lo contraròtle de la Superliga. Tot aquò demòra de confirmar e se’n sauprà mai a l’AG de la Federacion prevista a la debuta de junh: realitat o novèla sèrp de mar?

Super-XIII: la pluèja se convida

Aquesta dimenjada, se deviá jogar l’avantdarrièra jornada de la fasa de classament. Mas l’auratge menèt a l’arrèst de la partida Limós-St Gaudenç e la partida Albi-Carcassona comencèt pas. Cossí tornar plaçar aquelas partidas alara que los barratges devián seguir la darrièra jornada?

Ça que la, dissabte, Lesinhan ganhèt una partida sens enjòc fàcia a Avinhon. Dimenge foguèt favorable a las colors catalanas: Pià foguèt sens pietat per Tolosa 76-0 e los Dragonets van ganhar a Vilafranca: 22-18.

En mai dels dos rescontres non jogats e non fixats, demòran de jogar las partidas:

• dissabte: TolosaVilafranca, Avinhon-Limós e Vilanòva-Lesinhan,

• dimenge: St GaudençAlbi e un decisiu Carcassona-Pià per l’obtencion de la segonda plaça qualificativa dirècta per las mièjas finalas.

Superliga: Pascas es pas fèsta pels Diables

La Superliga a abandonat lo temps fòl de Pascas que vesiá los clubs jogar 3 partidas en un desenat de jorns per gardar un ritme regular a la competicion e evitar aquel moment bèl de nafraduras.

Dijòus, mercé a un tombat a la 76a minuta, Wakefield batiá d’un punt Castleford: 13-12. Divendres, Hull KR anava ganhar lo dèrbi de la vila: 28-14 cò d’Hull FC. Wigan ganhva fàcia a St Helens: 24-14 e Leeds èra plan mai fòrt qu’Huddersfield: 28-6.

Dissabte, Leigh batiá Warrington 18-14. Per lor part, los Dragons recebián Salford a Brutus. Marquèron tres ensages tre lo primièr quart d’ora e mantenguèron la manmesa sus la partida per véncer 38-10. L’alièr dels catalans Tom Makinson ne profeitèt per marcar tres ensages e passar la barra dels 1500 punts marcats en Super-Liga.

Novèla recepcion a Brutus aqueste dissabte 26 d’abril: Wakefield (partida a 6 e mièja del vèspre).

NRL: los dògols tenon de caissals solides

Dijòus, los Dragons batèron Manly 20-18. Divendres, cò dels Dalfins, la Tempèsta menèt 16-0 mas perdèt 22-42. Los Dògols demòran al cap del classament de l’NRL aprèp lor seisena victòria: 32-0 fàcia als Lapinons.

Dissabte, las pantèras infligisson una rosta 40-12 als Polets-Roosters. A Auckland, jos una pluèja bèla, lo dobertura dels Warriors Metcalfe manca una penalitat e tres transformacions: aquò mena l’esquipa a jogar lo punt en aur fàcia als Cavals Fòls ont Reynòlds a ensacat las 3 transformacions. L’arrièr de Brisbane Walsh manda la palma fòra limits sul còp de pè d’entamenada e Metcalfe ensaca la penalitat dels 50 mètres per balhar la victòria als locals 20-18!

Dimenge, Canberra anèt batre los Titans 30-20 e Newcastle subiguèt la lei de Cronulla 14-34.