La campanha No Mow May, lançada per l’organizacion ecologista Plantlife, encoratja a segar pas l’èrba pendent tot lo mes de mai. La tòca es de limitar l’impacte uman suls insèctes pollinizaires, coma las abelhas, en daissant créisser las flors salvatjas coma los pissalièches, las margaridetas o los treules.

Aital, se favorís l’alimentacion e l’abitat d’aquela fauna essenciala, a un moment ont los aucèls bastisson tanben lors nises. Se recomanda de perseguir l’iniciativa après lo mes de mai per ne multiplicar los beneficis.

Un autre avantatge es climatic: las èrbas nautas ajudan a servar l’umiditat e a refrescar l’environament en estiu. Un espaci non segat pòt restar agradiu visualament, amb una tondeson mai corta suls bòrds o un camin marcat.

Enfin, se pòt anar mai luènh encara, en plantant de flors favorablas als pollinizaires gràcias a de paquetons de granas especialas.