Un episòdi novèl ven brandir l’afar de las aigas contaminadas, revelada fa un an per la cellula d’investigacion de Radio France e Le Monde. Aqueste còp es l’usina Perrier, situada dins la Costièra de Nimes, que contunha al còr de l’escàndol. Segon France Bleu, de bacterias patogènas son estadas detectadas dins de centenas de milièrs de botelhas, çò qu’empenh las autoritats sanitàrias a recomandar quitament lo retirament del labèl “aiga minerala naturala” de la marca.

Serián concernidas mai o mens 300 000 botelhas de Perrier de 75 centilitres produchas a Vergesa. Malgrat que Nestlé afirme qu’aqueles produches foguèron pas comercializats, son ja en cors de mesuras de blocatge e de destruccion dels lòts. Pasmens, la gestion tardièra d’aquela crisi per l’entrepresa lèva de vivas inquietuds. Segon la lei, tota contaminacion potencialament perilhosa per la santat publica deu èsser senhalada sul pic a las autoritats. Dins aquel cas, l’agéncia regionala de santat foguèt pas informada que mantun jorn après la deteccion del problèma.

L’ONG Foodwatch, que denóncia la negligéncia, estima qu’aquel retard es “inacceptable” e que Nestlé ne deurà assumir las consequéncias. Aquel escàndol interven dins un contèxt ja marcat per de revelacions sus la contaminacion de las fonts d’aiga minerala del grop, sustot per de bacterias, de pesticidas e de substàncias quimicas perilhosas coma las PFAS (acronim anglés de las substàncias per- e polifluoroalquiladas). A despart de Perrier, Vittel, Hépar e Contrex foguèron ja denonciadas l’an passat per l’Agéncia Nacionala de Seguretat Sanitària de l’Alimentacion per las meteissas rasons. Alavetz, la companhiá Nestlé s’èra defenduda en declarant que la qualitat de sas aigas èra confòrma a la reglamentacion.