Prengam (a l’azard) un afogat tretzista de Carcassona. Dissabte de vèspre, anèt al Molin, veire la mièja finala de Copa de França dels U17 entre Lesinhan e Carcassona. Dins lo primièr temps, l’ASC impausèt sa lei: 22-0. A la represa, la partida cambièt de fisionomia. Lo dobertura canari aguèt la bona idèa de passar un tombat qu’assegurèt la victòria de Carcassona: 23-22.

Puèi, prenguèt la rota de Brutus per seguir lo rescontre de Superliga entre Dragons e Wakefield. A la pausa, fasiá lo morre que los angleses menavan 18-8. Amb plaser, vegèt los catalans ragantar lo retard e mai prene l’avantatge: 20-18. Mas, gaireben sus la còrna, Wakefield tornava a egalitat e ne caliá passar pel punt en aur. La defensa anglesa montava a fum sul dobertura Keary que voliá temptar lo tombat, l’australian transmetèt la palma al centre Reimis Smith qu’anèt marcat l’ensag de la ganha: 24-20.

Dimenge, de bon matin, fintèt la partida NRL entre Tigres e Làmias. Aquí tanben aguèt dreit a una sesilha de punt en aur a l’avantatge dels Tigres: 20-18.

Li demorava d’anar seguir l’afrontament Carcassona-Pià dimenge de vèspre a Domèc. Enjòc: una plaça qualificativa dirècta per las mièjas finalas. La partida foguèt engatjada e sarrada. Se pòt dire que las defensas defendèron! 2-2 a la pausa. Puèi, Carcassona preniá l’avantatge amb un ensag transformat. Pià voliá pas reconéisser la desfaita e marcava un ensag a 2 minutas de la fin, mas del canton, lo tustaire capitèt pas d’ensacar la transformacion. Victòria carcassonesa: 8-6. Vesètz que cal aver lo còr plan solide e plan estacat per seguir una partida de 13 que l’epilòg arriba sovent plan tard.

Super-XIII: final de la fasa de classament dins la confusion

Aquesta dimenjada, se jogava la 22a e darrièra jornada de la fasa de classament del Super-XIII. Albi confirmèt sa qualificacion per la mièja finala en anent batre St Gaudenç 36-22. Dins las partidas sens enjòc, victòrias al defòra per Vilafranca a Tolosa 20-8 e per Lesinhan a Vilanòva: 28-22. Limós s’anava impausar en Avinhon 34-26.

Solament, demòran de jogar las 2 partidas que se poguèron pas tenir lo dissabte 19 passat: Limós-St Gaudenç e Albi-Carcassona. Coma los barratges èran fixats per aquesta primièra dimenjada de mai, la Federacion a demandat que las 2 partidas se jòguen aqueste dimècres 30 d’abril. Lo tablèu de las fasas finalas serà fixat aprèp los resultats d’aquesta darrièra serada.

Per contra, en Elèit 2, dissabte en mièja finala, Vilagalhenc-Argon reçauprà Illa qu’a eliminat l’Escura: 25-8. L’autra mièja finala opausarà Palau e Carpentràs qu’a escartat Pàmias: 30-22.

Superliga: Hull KR mena la dança

La jornada de Superliga se dobriguèt dijòus amb la victòria de Warrington fàcia a Saint Helens: 32-18. Divendres, lo primadièr Hull KR s’anèt impausar a Leeds 20-14. Dissabte, victòrias al defòra per Castleford a Huddesfield: 30-12 e per Leigh a Salford: 28-6. Dimenge, neta victòria de Wigan a Hull FC: 36-12.

Dissabte e dimenge, la Dimenjada Magica se tendrà a Newcastle. Los Dragons jogaràn la partida de dubertura fàcia a Leigh. Seguiràn las partidas Hull KR-Salford e Saint Helens-Leeds. Al programa de dimenge 4 de mai: Huddersfield-Hull FC; Wigan-Warrington e Castleford-Wakefield.

En Championship, Tolosa es anat s’impausar a Featherstone: 18-10. Aqueste dissabte, Halifax vendrà jogar a Ernèst Wallon.

NRL: lo campion Penrith darrièr al classament!

Suspresa bèla al classament de l’NRL: aprèp una novèla desfaita sus sa pelena e jos la pluèja fàcia a Manly: 10-26, lo campion Penrith se trapa a la darrièra plaça del classament de l’NRL! Lo cap de fila, los Dògols, a tanben conegut la desfaita cò dels Cavals Fòls: 18-42. Los Polets èran superiors als Dragons: 46-18. Demoravan tanben mèstres a l’ostal: los neozelandeses fàcia a Newcastle: 26-12, la Tempèsta fàcia als Lapinons: 24-16, los Vaquièrs fàcia als Titans: 50-18 e Canberra fàcia als Dalfins: 40-28.

De notar que lo còrs arbitral se mòstra d’una mai granda severitat per totes los placatges nauts e cargas a l’espatla. Dins aquesta 8a jornada, 18 jogaires an conegut lo carton jaune (exclusion de 10 minutas) e 29 son estats plaçats sul rapòrt e lor cas serà estudiat per la comission de disciplina.

Cò de las femeninas, lo primièr dels tres tèstes de 2025 dels Estats d’Origina se jogarà aqueste dijòus 1r de mai a Brisbane.