Ièr diluns 28 d’abril a 12h33 s’amortèt l’electricitat dins tota la peninsula Iberica e la Val d’Aran. La pana daissèt sens electricitat tota la part continentala de l’estat espanhòl, Andòrra e Portugal. La redaccion de Jornalet, a Barcelona, recobrèt l’electricitat dins la nuèch de diluns a dimars e fins a 3h s’èra pas restablida la connexion telefonica e d’internet.

La peninsula Iberica e la val d'Aran foguèron  tocadas ièr diluns a partir de 12h33 per una copadura de corrent d’amplor inedita. L’electricitat s'es recobrada progressivament e sabèm pas encara quora serà al 100% en foncionament. Qualques parts del Bascoat Nòrd  patiguèron tanplan la granda pana.

La situacion foguèt pertot apocaliptica: fuòcs de circulacion atudats, trens e mètros a l’arrèst, abséncia totala de ret telefonic… Los tramvais, mètros e trens quitèron de foncionar en Espanha e Portugal e mai de 30 000 passatgièrs aguèron d'èsser evacuats e lotjats provisòriament. De garas e d’autras zònas abilitadas per se pausar aculhiguèron lo mond que podián pas rintrar en cò lor per manca de trens. Los aparelhs de ràdio tradicionals amb de batariás foguèron lo ben mai presat dels ciutadans e dins totas las botigas se se son agotats. Solament los qu’avián d’argent en liquid poguèron far de crompas. La majoritat dels comèrcis barrèron.

Segon las primièras informacions oficialas, la causa seriá una pèrda sibda de 15 gigawatts, çò que provoquèt automaticament la desconnexion del ret electric iberic de la rèsta d’Euròpa. Aran, e mai siá pas geograficament dins la peninsula Iberica, depend del provesiment peninsular. Esperam de conèisser lo mai lèu possible las causas exactas d’aquela pana inedita.

Lo govèrn espanhòl a activat lo nivèl 3 d’emergéncia estatala e a desplegada l’armada en mantun territòri.