Las escòlas publicas, privadas e jos contracte de l’estat francés an recebut una circulara que las obliga d’afichar la bandièra francesa e un tèxt legal de 1789.

Totas las escòlas del país nòstre, levat las de Mónegue, d’Aran e de las Valadas, an recebut una circulara del Ministèri de l’Educacion que remembra que, segon la Lei d’Orientacion e Programacion per la Refondacion de la Republica, es obligatòri que la faciada dels establiments ajan los drapèls francés e europèu. Es tanben obligatòri d’afichar la Declaracion dels Dreches de l’Òme e del Ciutadan de 1789 d’una manièra visibla.
 
Segon d’informacions del jornal breton 7Seizh, s’es remarcat ja lo profièch comercial d’aquel mandat nacionalista. Tre ièr de matin circula sus las boitas oficialas de las escòlas (nomenadas las “boitas convergéncia”) d’e-mails que reprenon los còdes de colors, la devisa oficiala e quitament lo lògo del Ministèri de l’Educacion Estatala. Aqueles e-mails son mandats per la societat Exalia, qu’es vendeira de drapèls franceses.