Actualitats
De manifestants croats an destruch de pancartas en cirillic a Vukovar
Los manifestants argumentan qu’es inacceptable que la vila aja de pancartas en sèrbe. Lo cònsol avertís d’un assag de “destabilizacion” de Vukovar e de Croàcia. Lo govèrn considèra que la destruccion de las pancartas es un exemple de “violéncia chauvinista”.
Lo govèrn croat a condemnat la “violéncia chauvinista” d’un grop de manifestants croats que, diluns passat, destruguèron divèrsas pancartas dins la vila de Vukovar, escrichas en cirillic, l’alfabet que los sèrbes emplegan per escriure. Las pancartas èran estadas installadas segon çò previst dins la Lei dels Dreches de las Minoritats de Croàcia, que las lengas e los alfabets dels grops minorizats se devon emplegar dins las comunas ont lo grop minorizat constituisca mai d’un tèrç de la populacion locala. A Vukovar, los sèrbes son 34,9%.
Lo sèrbe, lo croat, lo bosnian e lo montenegrin apertenon a la meteissa lenga, nomenada sèrbocroat —mai que mai a l’epòca iogoslava—, qu’es considerada uèi coma una lenga pluricentrica. Los croats escrivon amb l’alfabet latin, del temps que los sèrbes emplegan dos alfabets: lo cirillic o lo latin.
Los manifestants croats dison qu’es totalament inacceptable que Vukovar —vila qu’eles percebon coma martira— aja de pancartas en l’alfabet dels sèrbes. Segon eles, caldriá solament emplegar la varietat croata escricha en caractèrs latins, e creson qu’emplegar lo cirillic equival a insultar la memòria dels croats que luchèron en defendent la vila pendent la guèrra d’independéncia de Croàcia, entre 1991 e 1995.
Un dels caps de la protèsta, Marjan Zivković, declarèt a EuroNews qu’es pas inquiet per “las sancions” per sos actes, e qu’aquò lo preocupa quitament pas que l’embarren en preson: “Que que siá es melhor que permetre qu’aquò se passe”, çò disiá.
Lo cònsol crida a la calma e demanda que la vila “venga pas Beirot”
Lo cònsol de Vukovar, Zeljko Sabo —qu’es en favor de las pancartas en cirillic e que foguèt reelegit en junh passat— considèra que las accions violentas son un assag de “destabilizar la vila e Croàcia”. Segon lo cònsol, degun deu pas “permetre” que Vukovar “venga Beirot”. Remembra tanben que i a ja divèrsas pancartas en cirillic a Vukovar dempuèi 1998, e que fins ara pausavan pas cap de chepic a degun.
Aqueste article ven del jornal catalan Nationalia.cat, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
lei sèrbes ortodoxes an tostemps emplegat l'alfabet cirilic, e quand èran a la tèsta de la federacion Iogoeslava impausavan aquest alfabet dins lei garas e aeroports de tot l'estat federau e parier dins l'Armada. mai dempuei una vintena d'annadas l'alfabet latin progressa en Serbia e aquo agrada pas gaire a d'escrivans sèrbes que ne son regretos, oblidèm pas nimai qu'a costat dau serbo-croate,exista la lenga eslovena qu'es diferènta e qu' a conquistat sei plen poders ambe l'independència urosament negociada en 1992. aquita li jamai agut d'a;lfabet cirillic
Aquò que'm hè pensar a la guèrra grafica qu'avem per aquí. Lo gascon qu'es plurigrafic autan com pluricentric. Destruchir de pancartas atau, aquerò qu'es meilèu egocentric.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari