Actualitats
L’Acadèmia d’Ais-Marselha informarà pas las familhas de la possibilitat d’aprene l’occitan
Segon lo rector nòu de l’acadèmia, l’ofèrta d’ensenhament dins la lenga del país satisfà la demanda e aquò es es pro. Aquò d’Aquí ne parlèt amb el
L’Acadèmia d’Ais-Marselha (Auts Alps, Alps d’Auta Provença, Vauclusa, Bocas de Ròse) organizarà pas d’informacion sus l’ensenhament de l’occitan. Pel rector nòu, l’ensenhament de la lenga d’òc satisfà la demanda, e farà pas cap d’esfòrç particular per informar los usatgièrs que pòdon causir d’ensenhament en occitan, se vòlon.
Segon lo nòu rector de l’Acadèmia d’Ais-Marselha, Ali Saïb, l’ensenhament de l’occitan “ja a luòc e ieu pòdi pas prene lei familhas per la man”, çò respondèt a la question que li pausèt Aquò d’Aquí.
Lo jornal numeric provençal explica que la Lei de Refondacion de l’Escòla, dins son article 27 bis, precisa que “las familhas devon èsser informadas de las diferentas ofèrtas d’aprendissatge de las lengas e culturas regionalas”. Los annèxes de la lei dison tanben que “dins las acadèmias concernidas, l’aprendissatge complementari d’una lenga regionala serà favorizat”. Cal remarcar los esfòrces que los ensenhaires d’occitan an fach per que la lei contenga aqueles articles, qu’Ali Saïb obsèrva pas.
De fach, la passivitat de Saïb es pas una novèla. Dempuèi dètz ans los rectors de l’Acadèmia d’Ais-Marselha emplegan los meteisses arguments per far pas cap de promocion del drech a l’escolarizacion dins la lenga del país. Pasmens las estatisticas mòstran que lo nombre d’escolans que demandan l’occitan puèja en Provença, del temps que dins los Alps la lenga coneis una situacion plan mai dificila.
“25 professors dins l’ensenhament public ensenhan especificament lo provençal dins l’acadèmia, contràriament a d’autras acadèmias”, çò diguèt Saïb, en ometent que totes aqueles professors an una segonda còrda a lor arc pedagogic. Tanben ocultèt lo fach que sovent lo nombre d’oras de trabalh per setmana dels professors d’occitan, tot bèl just, es pas complet en occitan, çò que los obliga de completar lor servici setmanièr en ensenhar d’autras matèrias dins la lenga de París.
Tanben arriba que certans professors d’occitan, tot essent pagats normalament, son entrepachats per exercir lor trabalh a causa de la marrida volontat de certans caps de collègis e licèus.
Encara a prepaus del planh dels jornalistas d’Aquò d’Aquí, coma qué s’informa pas las familhas, lo rector assegurèt que “ven a las familhas de se far conéisser”.
Aquò d’Aquí parlèt amb lo rector lo 2 de setembre passat, dins l’encastre d’una conferéncia de premsa, e ne publica un bèl reportatge.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#6 E lo berbèr? Se pòt aprene lo berbèr a l'escòla? Me sembla que barrèjas arabs e berbèrs. M'estonava que los parents magrebins sián pas afogats per que l'escòla ensenhe l'arab als enfants seus. E puèi me pensèri: los que son berbèrs, un còp partits del Magreb, son pas aquí per que los emmèrdan amb l'arab (veire lo Maròc ont un pichòt nom arab al mens es obligatòri...).
Per çò qu'es de l'informacion dins las autras acadèmias, lo refús de comunicar pòt tanben venir de l'administracion dels establiments. N'en coneissèm plan de principals o provisors que s'assètan sul reglament per ideologia pura. E quand aquò los arrenga per la reparticion de las classas o los oraris... De còps es lo rector qu'es pas contra l'informacion sus l'occitan mas l'inspector d'acadèmia del departament que fa l'ase.
8 milions d'Arabs en França. (A vista de nas.)
Dens quant d'escòlas, de collegis e de licèus, se pòt apréner l'arab? E lo portugués?
La tradicion de mespresar la riquessa culturau e linguistica qu'ei tostemps plan viva en França.
E si los deumaus contra l'occitan son hèit, be n'a enquèra, deumaus a har!
"L’Acadèmia d’Ais-Marselha informarà pas las familhas de la possibilitat d’aprene l’occitan"...
E ben qué?
Las autas ac hèn?
Qu'èi dus dròlles escolarizats dens l'academia de Tolosa e ne m'informèn pas jamei d'arren.
Hèra de collègis e de licèus ne hèn pas briga d'occitan.
Perqué? Las academias que receven un nombre d'"òras-pòste" qui reparteishen entre los establiments e qui ei a puish près lo mème cada an, que la demanda i sia o pas.
Dab aquò quand obreishen ua "opcion" (per'mor qu'ei tostemps interdit que sia un ensenhament obligatòri) quauqua part que la barran enlòc mei.
Lo departament concernit o pòt pas faire? Se'n fotem de çò que ditz o pas lo rector. Francament.
Cal pas acablar aquel brave rector. Lo gojat fa sonque son trabalh, executa sa mission, e o fa d'una manièra onorabla.
Son trabalh?
Fa desaparéisser l'ensenhament de l'occitan en Provença al nom de la pas-res-publica francesa.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari