Lo Papa Francés auriá telefonat a Christopher Trutiño, un jove tolosan qu’aviá mandat una letra al pontife per son chepic d’èsser catolic practicant e omosexual, segon çò qu’expliquèt lo jovent a La Dépêche.

“Christopher? Soi lo Papa Francés”, çò foguèron —segon Trutiño— los primièrs mots prononciats pel pontife quand lo jovent respondèt al telefòn. “Lo Papa me telefonèt dijòus 29 d’agost a 14h. La convèrsa durèt nòu minutas. O ai volgut explicar per rendre omenatge a aquel papa excepcional”, çò disiá lo jove.
 
La convèrsa se seriá debanada en espanhòl, lenga mairala del papa e tanben del jove tolosan que la ten de sa maire. E mai, se  serián tutejats a la demanda de Francés. “Ai ben recebut la letra que me mandères”, çò auriá dich, e aurián començat de parlar de la situacion del jovent e de sa vida. “Ton omosexualitat es pas grèva. Cal restar coratjós, cal contunhar de creire, de pregar, de restar bon”.
 
“D’una faiçon o d’una autra, totes sèm los enfants de Dieu. Es per aquò que cal contunhar d’èsser bon. Tornam totes a Dieu, e Dieu sol sap s’òm es bon”, çò li auriá dich lo papa.
 
Trutiño conta que la convèrsa arribèt a la fin quand lo pontife li diguèt que podiá pas pus parlar perque deviá recebre un rei. D’efièch, aquel jorn lo papa recebèt lo Rei Abd Allah II de Jordania per una reünion d’urgéncia sus la situacion en Siria, çò precisa La Dépêche.
 
Los jornalistas del mèdia occitan d’expression francesa verifiquèron lo numèro d’ont veniá la telefonada. Efectivament lo 009 06 69 82 correspond a la centrala telefonica del Vatican.
 
 
Lo Vatican desmentís aquelas informacions
 
Lo director de premsa del Vatican, Federico Lombardi, refusèt de confirmar aquelas informacions als jornalistas de La Dépêche. “Tocant las questions qu’intran dins l’esfèra privada del sant paire, sèm pas autorizats a donar una responsa que siá afirmativa o negativa”, çò lor diguèt.
 
Per contra Lombardi desmentiguèt aquelas informacions al correspondent a Roma de France 2. “Lo servici de premsa del Vatican a desmentit al près del nòstre correspondent a Roma, Renaud Bernard, que lo papa aja telefonat a un jove tolosan”, çò indiquèt Olivier Siou, capredactor a France 2, sus son compte de Twitter.
 

Le service de presse du Vatican a démenti auprès de notre correspondant à Rome @renobernard que le pape ait téléphoné à un jeune Toulousain.

— Olivier Siou (@oliviersiou1) September 6, 2013

 

Es pas lo primièr còp totun que lo sant paire telefona a un fidèl. Lo 22 d’agost telefonèt a un jove estudiant italian que veniá de pèrdre son fraire, e lo 28 d’agost a una gojata argentina victima d’un violament. Aqueste còp auriá telefonat a un jove tolosan victima de l’omofobia.
 
De fach, dins l’avion que lo menèt de Rio de Janeiro cap al Vatican, lo Papa Francés diguèt en julhet passat a de jornalistas de tot lo Mond qu’el es pas degun per jutjar los omosexuals: “S’una persona es gai e cèrca lo Sénher e a de bona volontat, qual soi ieu per la criticar?” Lo pontife diguèt que los gais deurián pas èsser marginalizats per la societat e mai se reconeis que lo catequisme de la Glèisa Catolica considèra coma un pecat los actes d’aquela orientacion sexuala.