Lo nòu president francés, François Hollande, a nomenat lo cònsol de Nantas e cap del grop parlamentari socialista, Jean-Marc Ayrault, nòu primièr ministre del govèrn de la Republica.

Ayrault es un collaborador qu'a tota la fisança d'Hollande e s'es impausat sus d'autres noms que sonavan amb fòrça: la secretària generala del PS, Martine Aubry; l'ex-primièr ministre Laurent Fabius; e lo pòrtavotz de la campanha d'Hollande, Pierre Moscovici. Lo president a fach l'anóncia après la longa ceremonia d'investidura debanada uèi pel matin a l'Elisi.



Hollande anonciarà deman lo sieu govèrn. Es estat uèi investit president, après formalizar amb Nicolas Sarkozy la cession de poders a l'Elisi. Dins lo sieu discors d'investidura, a remarcat que "França a de besonh calma, reconciliacion" e a apondut que lo cap de l'estat deu "far viure amassa totes los franceses sens distincion". 


La setmana passada s'anoncièt ja la demission de l'actual primièr ministre, François Fillon, e del rèsta de l'executiu francés.