Pau acuèlh, ièr e uei, l’Universitat de la Defensa, un eveniment organizat per las comissions de l’Assemblada e lo Senat de França. S’agís de l’11a edicion d’una cima politica, militara e industriala qu’acuèlh 400 personalitats de tot lo Mond, per amassar politicians e fabricants d’armas e per abordar l’afar de la “defensa”.
 
La guèrra en Mali e l’actualitat siriana noirisson las discussions entre los participants, que i son anats “per aprene de problematicas essencialas” segon lo General Pierre Liot de Nortbecourt. Segon aquel militar, l’Universitat de la Defensa tracta sustot “de reflectir l’avenir de l’Euròpa de la defensa”.
 
I participan de parlamentaris, de ministres, de secretaris d’estat, de caps d’estat major e de representants del lobby economicoindustrial qu’esponsoriza la cima.
 
“Aquò es la reünion annuala mai importanta amb d’elegits de l’Assemblada e del Senat. Cap d’autra comission parlamentària se pòt valorizar d’un nivèl talament naut”, çò declarèt lo director general de l’Universitat, Eric Schmidt.
 
A Pau i a la basa d’elicoptèrs de guèrra mai granda d’Euròpa, que son sovent mobilizats.
 
 
Protèstas
 
Libertat! a organizat una campanha de protèsta. “Lo noste dever qu’ei de combàter lo noste imperialisme francés, aciu, a noste”, çò ditz lo movement occitan d’esquèrra revolucionària.
 
“Coma occitans e biarnés ne podem pas qu’opausà’ns au hèit que los nostes politics deu PS accèpten dab tant de preissa rescontres d’aqueste escantilh sus la nosta tèrra. Lo quite partit que’s revendica enqüèra de Joan Jaurés, qui estó tuat per lo son antimilitarisme e lo son internacionalisme”, çò apond lo manifèst que refusa l’eveniment (a Pau e endacòm mai), “las guèrras imperialistas” e “l’armada francesa”.