L’estat japonés executèt a la forca un presonièr dins sos 73 ans, lo seisen tuat ongan per la pena capitala. Lo presonièr, Tokuhisa Kamugai, foguèt executat dijòus passat de matin a Tòquio, après èsser condemnat fa un an e mièg per l’assassinat del proprietari d’un restaurant del quartièr chinés de Yokohama.
 
Dels païses industrializats e democratics, la pena capitala s’aplica solament en Japon e als Estats Units. Lo país nipon executa los condemnats a la forca amb un grand secret, sens avertir abans los condemnats e sens cap de testimòni. Mai d’una organizacion umanitària o critican dempuèi longtemps. Amnestia Internacionala de Tòquio soslinha qu’aquesta execucion se passa justament qualques jorns après que la capitala japonesa siá elegida sedença dels Jòcs Olimpics de 2020. “S’agís d’una accion contrària a l’esperit olimpic e que traís la societat internacionala”, çò ditz l’ONG.
 
A l’ora d’ara i a en Japon 132 presonièrs condemnats a la pena capitala. Abans de tuar Tokuhisa Kamugai, la darrièra execucion se passèt lo 26 d’abril passat, quand pengèron dos acusats d’assassinat. Las sièis execucions d’ongan son estadas aprovadas jol mandat del govèrn del primièr ministre, Shinzo Abe, qu’arribèt al poder en decembre d’arunan.