La sonda Voyager 1 es venguda lo primièr objècte fach pels òmes qu’es intrat dins l’espaci interstellar e que, per tant, a quitat lo Sistèma Solar, segon çò que confirmèt divendres passat la NASA. Naviga pas pus dins de particulas emesas pel Solelh mas dins de particulas produsidas dins l’espaci exterior.

De scientifics de la NASA explican que Voyager 1 a ja crosat la frontièra magnetica que separa lo Solelh amb las planetas del Sistèma Solar e amb vent solar de la rèsta de la Galaxia. O a fach 36 ans après sa partença.
 
Fa qualques ans que se parlava se Voyager 1 èra ja sortit del Sistèma Solar, mas la NASA o aviá pas encara confirmat. Fins fa un an, Voyager 1 transitava dins l’eliosfèra, una enòrma massa de particulas solaras qu’entorneja las planetas e las protegís de las radiacions galacticas. Pasmens, a l’ora d’ara —ja en defòra de l’eliosfèra— la nau es dins un espaci escur e freg entre las estelas.
 
Las bessonas Voyager 1 e Voyager 2 se lancèron en 1977. Voyager 1 aviá per tòca d’explorar Jupitèr e Saturne, del temps que Voyager 2 anèt a Uranus e Neptun. Los dos aparelhs contunhèron d’emetre lors donadas fins que, lo 25 d’agost d’arunan, Voyager 1 experimentèt una casuda subta de las particulas cargadas d’energia que se produsisson dins l’eliosfèra. Aquí los scientifics esperavan que la direccion del camp magnetic dins l’espaci s’inversèsse, en confirmant la sortida del Sistèma Solar. Mas aquò se passèt pas immediatament: “La còla Voyager aviá de besonh de temps per analisar las pròvas e lor donar un sens. Mas ara podèm respondre a la question que totes esperam: avèm capitat? Òc ben, avèm capitat”, çò diguèt Ed Stone, scientific e cap de la mission.
 
Voyager 1, qu’es ara a 18 miliards de quilomètres de la Tèrra, balhèt a l’Umanitat los primièrs imatges de Jupitèr e de Saturne de près.