La rintrada escolara a començat a las Illas Balearas amb los docents en guèrra a causa de l’imposicion del Tractat Integral de las Lengas (TIL), un decret que mesestima lo catalan dins l’educacion. L’annada escolara comencèt divendres passat amb de protèstas contra aquela imposicion. De professors, de parents e d’escolans s’abilhèron de verd per protestar contra aquel decret que lo Govèrn Balear ven d’impausar, e mai se lo jutge l’a suspendut. Las classas devián començar amb una cauma indefinida, que lo govèrn de las illas tanben empediguèt, en l’ajornant fins a uèi. Alavetz, divendres comencèron las classas e uèi comença la cauma.
 
Mai d’una escòla an plaçat de laces verds sus las faciadas, mentre que lo mond vestissián de camisetas d’aquela color, causida per protestar. E mai se divendres èra pas oficialament un jorn de cauma, pertot se podiá veire de pancartas que disián “Avui no és un dia normal” (“Uèi es pas un jorn normal”). Dins aquel sens, l’etiqueta #avuinoesundianormal se repetissiá sus Twitter.
 
Dins mai d’un ensag dels sindicats de professors per arribar a un acòrdi amb lo govèrn, la conselhièra Joana Maria Camps a dich qualques còps que lo TIL serà pas retirat, mas aplicat immediatament.
 
Tres directors d’escòlas segondàrias de Menòrca son estats licenciats, coma mesura intimidatòria pels autres que protèstan.
 
Aital doncas, comença uèi una “cauma indefinida per defendre los interèsses dels escolans e lo drech a una educacion de qualitat que garentisca l’egalitat d’oportunitats e que bastisca una escòla inclusiva e en catalan”, segon los sindicats STEI e CCOO.
 
Al delà, lo sindicat STEI a prepausat als centres de tornar penjar los laces amb lo drapèl catalan. Aqueles laces se pengèron sus quasi totas las escòlas de las illas, coma protèsta fàcia al govèrn autonomic; qu’aquel govèrn ataca los mèdias en catalan e dirèctament la lenga, dempuèi que la coneissença del catalan a quitat d’èsser un requisit per èsser foncionari. Cal remarcar qu’una nòva grafia de tipe fonetic es estada impausada pel govèrn per escriure segon las varietats localas de las illas, e mai se las escòlas refusan los libres escriches aital. Lo Govèrn Balear a fach una lei per enebir los laces amb lo drapèl catalan, mas aquela lei es pas encara formalament aprovada.