Dètz mila personas segon los organizaires, aperaquí 1300 segon la polícia, manifestèron dissabte a Marselha contra la tenguda de l’universitat d’estiu del Front Nacional (FN), que s’es debanada a la Ciutat Focèa pendent la dimenjada. Se manifestèt en seguida de la crida del collectiu Marselha Solidària Còntra l’Extrèma Drecha, qu’amassa un quarantenat d’associacions. La manifestacion se debanèt dins la calma entre lo Pòrt Vielh e la Plaça Castelana.
 
“Oblidem ren de l’FN, partit deis assassins, perdonem pas!”, çò disián los manifestants que d’unes que i a brandissián de retraches de Clément Méric, lo jove breton assassinat brutalament a París en junh passat en mans de militants de l’ultradrecha. Seguissián la protèsta de grops antifaissistas, de movements de lucha contra l’omofobia e de qualques partits e sindicats d’esquèrra coma lo Partit Comunista, lo Nòu Partit Anticapitalista e la CGT.
 
Segon un sondatge CSA per BFM TV, Le Figaro e Orange, dins las eleccions municipalas avenidoiras, l’FN pojariá de quatre ponches del temps que l’UMP ne perdriá tres e los partits d’“esquèrra” ne perdrián dos. L’FN poiriá quitament èsser lo segond partit de l’estat francés davant lo PS. Dins un encastre de crisi economica e sociala, es pus grand lo chepic d’una creissença de las opcions politicas d’ultradrecha, e alavetz de la xenofobia, l’omofobia, lo masclisme e las agressions faissistas.