Per fòrça mond lo nom de Roland Garros es fòrça ligat al calendièr mondial del tènis. Mas, de fach, lo tènis es çò mens important dins la biografia d’aquel personatge nascut a la Reünion, filh de paire occitan e de maire bretona. Aital o podèm legir sul panèl que remembra sa naissença a Saint-Denis, capitala de l’illa: “Nasquèt aicí lo 6 d’octòbre de 1888 Roland Garros, aviator, lo primièr a traversar la Mediterranèa lo 23 de setembre de 1913. Foguèt l’iniciaire del combat aerian”.
 
Diluns fasiá cent ans que Garros faguèt istòria en crosant pel primièr còp la Mediterranèa en avion e sens escalas, dempuèi Frejús (Esterèu) fins a Bizèrta (Tunisia). Un an puèi, en seguida del començament de la Primièra Guèrra Mondiala, s’enrotlèt dins l’armada francesa e se distinguiguèt en las batalhas aerianas.
 
Roland Garros, après sos primièrs ans a la Reünion, arribèt a París dins sos dotze ans, prenguèt una pneumonia e se sonhèt en practicant l’espòrt, mai que mai lo ciclisme, lo fotbòl, lo rugbi e lo tènis. Ça que la, sa passion, ja de jove, èra l’aviacion. Sa carrièra coma pilòt comencèt en 1909 e abans la Primièra Guèrra Mondiala aviá ja vesitat los Estats Units e l’America del Sud. Lo 23 de setembre de 1913, fa cent ans, capitèt de volar sens escalas, d’Occitània a Tunisia. Es un eveniment que se remembrèt dimenge passat a Tolosa amb una replica de l’avion qu’empleguèt, lo Morane-Saulnier tipe G.
 
Garros moriguèt lo 5 d’octòbre de 1918, quand son avion foguèt abatut près de Vouziers (Champanha), un mes abans la fin de la guèrra e un jorn abans son trenten anniversari.
 
En 1920, lo club de tènis que Garros vesitava quand èra estudiant a París balhèt son nom a l’estadi ont se debana annalament lo torneg de tènis de França. L’aeropòrt internacional de l’illa de la Reünion a tanben lo nom de Roland Garros.
 
A l’escasença del centenari de la traversada aeriana de la Mediterranèa, France TV en la Reünion a produsit un documentari web sus la vida de Roland Garros.