Lo 16 de setembre passat, la conselhièra municipala Anna-Maria Hautant, elegida pel Partit Occitan (PÒC) a la municipalitat d’Aurenja (Comtat Venaicin), patiguèt un autre assag d’expulsion manu militari del conselh municipal pr’amor qu’aviá mostrat son desacòrdi amb lo primièr cònsol Jacques Bompard, de la Liga del Sud, èx-Front Nacional (FN).
 
Pendent que se debatiá l’aprobacion de la carta dels ecoquartièrs, Hautant mostrèt son desacòrdi en argumentant sas intervencions. Lo primièr cònsol Bompard interrompèt la conselhièra occitanista, en considerant sas ironias coma una provocacion, e exigiguèt l’expulsion d’Hautant per contunhar lo conselh. Apelèt la polícia municipala.
 
Del temps que los policièrs arribavan, la tension se calmèt e los policièrs demorèron a la pòrta del conselh. Mas qualques minutas puèi, la tension montèt tornarmai amb una autra intervencion dissidenta d’Anna-Maria Hautant. Es alavetz que lo cònsol ultradrechan demandèt a la polícia d’expulsar l’elegida municipala.
 
Hautant se botgèt pas e se mostrèt ferma davant los tres policièrs que la venguèron expulsar. “Me toquetz pas”, lor diguèt. Los jornalistas presents, la desaprobacion del public que fasián de fòtos amb los telefòns mobils e la fermetat de la conselhièra faguèron recular los policièrs.
 
Es pas lo primièr còp qu’aquò se passa. Lo 21 de genièr de 2004, lo cònsol faguèt venir sièis policièrs qu’expulsèron per la fòrça l’elegida occitanista del conselh municipal.
 
Sabèm pas s’aquela actitud del cònsol, lo que voliá “faire de la vila d’Aurenja una veirina dei capacitats de gestion de l’FN”, se motiva pr’amor de son concèpte de la democracia, o pr’amor de la paur que s’escote publicament de vejaires dissidents.