Las organizacions indigènas temon que las retalhadas previstas en politica sociala afècten negativament las comunautats originàrias. La coalicion conservatritz, venceira a las eleccions de fa doas setmanas, promet un referendum per inscriure los aborigèns dins la constitucion.

Los resultats de las eleccions parlamentàrias del 7 de setembre en Austràlia an significat un cambiament important pel país: la drecha a reconquerit lo poder, en detriment dels socialdemocratas qu’an governat aquestes darrièrs ans.
Davant aquel cambiament de senhal politic, las organizacions dels aborigèns se demandan se pòdon esperar una politica que las favorize mai que lo pauc qu’an recebut dels que se’n van ara. De çò qu’an dich los menaires de la coalicion conservatritz venceira, i a fòrça dobtes sus l’impacte que lors politicas socialas poiràn aver sus los aborigèns, una de las comunautats mai desfavorizadas del país: son lo 3% de la populacion (670 000, segon lo cens de 2011), mas concentran la majoritat dels problèmas endemics d’Austràlia: lo 41% de las familhas aborigènas son pauras, e l’esperança de vida es fòrça pus bassa (17% de mens que la mejana estatala) dins una societat que, en tèrmes generals, es benestanta.
 
Los dos principals partits an promés que convocaràn un referendum per tal que la societat australiana se pronóncie per saber se vòl o pas inscriure dins la constitucion lo fach que los aborigèns son los primièrs abitants del país. Lo programa de la coalicion ganhaira especifica que lo govèrn nòu presentarà una propòsta d’emendament constitucional durant los dotze primièrs meses de legislatura.
 
L’eventuala reconeissença comportariá lo dever politic d’èsser mai atentius a respècte dels dreches especifics d’aquela partida ben definida de la societat australiana. Un sondatge recent ditz que lo 70% dels australians son d’acòrdi per modificar la constitucion dins aquel objectiu.
 
 
Bonas paraulas del nòu primièr ministre
 
Tocant çò mai immediat, lo nòu primièr ministre, Tony Abbott, a anonciat que donarà de pròvas de son engatjament per luchar contra las diferéncias entre la populacion australiana: “Espèri d’èsser pas sonque primièr ministre, mas tanben primièr ministre dels afars aborigèns”, çò a dich. Una promessa, ça que la, contestada subran per las organizacions dels aborigèns que, precisament, acusavan aquel meteis candidat d’aver revelat son intencion de reduire lo budget destinat a las ajudas socialas.
 
Tanben los socialdemocratas avián pres la paraula per afirmar qu’eles èran pas dispausats a rebaissar lo budget dins de tèmas de caractèr social, e que farián tot çò possible per reduire la taxa de caumatge —qu’afècta pus negativament los aborigèns— e que refortirián lo programa que prevei, entre d’autres avantatges, de donar a aqueles lo contraròtle dels pargues regionals del Nòrd d’Austràlia. Mas son de promessas casudas dins lo voide, levat se lo nòu cap de govèrn las assumís.
 
L’extrèma drecha, valent a dire los nacionalistas australians del Partit Dreiça-te Austràlia (Rise Up Australia Party), es la sola qu’a pres una posicion clara contra eles. Sa candidata Pam Hecht, en un rescontre, declarava en ton d’alèrta: “Lo mond o sabon pas, mas an de saber que fòrça musulmans donan cada jorn mai d’argent als aborigèns per que se convertiscan a l’islam. Nòstra inquietud es que, se los primièrs abitants del país se convertisson a lor religion, a la longa la tèrra australiana finirà que pertanherà a Allà e l’islam auriá d’i èsser la sola religion”.
 
Benlèu una consolacion per los aborigèns serà qu’un de lors membres, Nova Peris —anciana medalhada olimpica— es estada elegida senatritz pel Partit Laborista. A promés qu’auçarà la votz, en aquela institucion pus nauta de la federacion australiana, per la metre, sustot, en favor de la santat e de l’emplec de sos compatriòtas.
 
 
 




Aqueste article es adaptat de Nationalia, amb qui Jornalet a un acòrdi de collaboracion.