Orror dins l’afar de la desparicion de Fiona. La maire Cécile Bourgeon a confessat a la polícia que sa filha, Fiona, foguèt tuada per son companh, Berkane Maklouf, qu’es pas lo paire de Fiona. Lo parelh Cécile Bourgeon e Berkane Maklouf enterrèron puèi Fiona près de Clarmont-Ferrand.

La maire de Fiona confessèt als policièrs a Perpinhan, dimècres passat de ser, que sa filha Fiona moriguèt, dins sos cinc ans, en seguida dels còps de son companh, segon çò qu’a raportat lo jornal La Montagne.
 
Cécile Bourgeon, qu’aviá assegurat fins alavetz que sa filha aviá desaparegut quand jogava al Pargue de Montjuset de Clarmont-Ferrand, lo 12 de mai passat, a confessat tot aquò als locals de la polícia judiciària de la vila nòrd-catalana al costat de son avocat, Gilles-Jean Portejoie.
 
Segon las fonts consultadas per La Montagne, Fiona moriguèt pels còps que recebèt. La tragèdia se passèt pendent una serada, lo 10 o l’11 de mai passats, ont participavan cinc personas, gardadas a vista dins aqueste afar.
 
L’avocat de Bourgeon a pas volgut precisar grand causa als jornalistas. “Fiona moriguèt accidentalament en seguida de còps qu’ela n’a pas portats personalament, plan evidentament”, çò diguèt l’avocat. La drolleta “foguèt enterrada dins la region de Clarmont-Ferrand”, çò apondèt sens precisar l’endrech.
 
La granda mobilizacion sociala que s’èra organizada en favor de la familha s’es sentida traïda. Aital s’es pogut remarcar per las concentracions davant lo comissariat, dimècres de ser, e pels nombroses comentaris asiroses que se pòdon legir sus Facebook e sus d’autres rets socials.
 
Cinc personas son en gàrdia a vista, dont la maire de la drolleta Cécile Bourgeon e son companh, Berkane Maklouf.