Dempuèi qu’un neofaissista a assassinat lo rapaire Pavlos Fyssas —àlias Killah P.—, l’estat grèc sembla de se revelhar e de realizar la gravitat de la situacion. An arrestat de dirigents e de deputats del partit d’extrèma drecha Chrysi Avgi (Alba Daurada). De policièrs e de militars semblan implicats dins la violéncia ultradrechista.

Dempuèi plusors annadas, s’es establit que l’organizacion neofaissista grèga Chrysi Avgi (Alba Daurada) ataca fisicament d’immigrants e de militants d’esquèrra. Recentament, de membres de Chrysi Avgi feriguèron de militants del Partit Comunista de Grècia (KKE) qu’empegavan d’afichas dins la localitat populara de Perama, près d’Atenas e del Pirèu.
 
Es dins la meteissa zòna, a Keratsini, que foguèt escotelat e assassinat lo militant antifaissista e  cantaire de rap Pavlos Fyssas, escaissat Killah P. segon son nom d’artista. Son assassin, Giorgos Roupakias, es membre de Chrysi Avgi e a admés lo crime. Aquel murtre se passèt dins la nuèch del 17 al 18 de setembre, gaire de temps après l’ataca contra los militants comunistas. Al moment de l’assassinat, lo neofaissistas avián agantat Fyssas e sos amics dins una emboscada.
 
Tre l’endeman, lo 18 de setembre, una manifestacion antifaissista se debanèt sus lo luòc del crime e foguèt reprimida violentament per la polícia, amb l’ajuda de “ciutadans indignats” pro curioses que semblavan pròches de l’extrèma drecha. D’antifaissistas foguèron obligats de s’escondre durant d’oras dins d’immòbles.
 
A l’encòp, tre lo murtre de Pavlos Fyssas, i aguèt de revelacions dins mai d’un jornal grèc que se basavan sus de testimoniatges de membres actius o ancians de Chrysi Avgi. S’i aprenguèt que Chrysi Avgi auriá una organizacion militara amb de batalhons d’assaut, entraïnats per de membres de las fòrças especialas de l’armada grèga.
 
Los servicis d’inspeccion intèrna de la polícia s’encarguèron de l’afaire tre las primièras revelacions de la premsa. Aquò entraïnèt fa qualques jorns de destitucions e mai de demissions dins la polícia e dins lo Servici Grèc d’Intelligéncia (EYP, dedicat a l’informacion interiora).
 
A la cima de l’aparelh judiciari grèc, lo viceprocuraire de la Cort de Cassacion, Charalambos Vourliotis, foguèt encargat de verificar se caliá far d’enseguidas contra los dirigents de Chrysi Avgi, que son suspèctes d’aver montat una “organizacion criminala”. En particular, lo viceprocuraire deviá veire s’òm podiá liar los caps de Chrysi Avgi amb un trentenat d’afaires non elucidats d’assassinats e d’agressions fisicas. Aquel viceprocuraire rendèt fa qualques jorns un rapòrt aclapant que descriviá un foncionament militar e piramidal dins Chrysi Avgi, inspirat per lo nazisme e, en particular, per lo Führerprinzip (“principi del menaire”).
 
En seguida d’aquel rapòrt, dissabte 28 de setembre, de matin, la polícia arrestèt de responsables importants de Chrysi Avgi: entre eles i a lo secretari general Nikos Michaloliakos, cinc deputats del parlament e qualques quadres locals. Tanben arrestèron de policièrs. A causa de la gravitat de las acusacions, se poguèt arrestar los deputats de Chrysi Avgi sens levar prèviament lor immunitat parlamentària.
 
Los arrestats son detenguts per la polícia grèga e presentaràn lor defensa pendent los jorns que venon.
 
S’es fach mai d’una interpretacion politica sus aquelas arrestacions. L’opausant grèc d’esquèrra Christos Serbos, dins lo sit web Iskra, pensa que “lo govèrn assajarà d’esplechar l’operacion menada contra Chrysi Avgi [...] amb la tòca d’accelerar, dins l’avenir pròche, l’adopcion de mesuras nòvas contra lo pòble e un novèl memorandum [paquet de mesuras d’austeritat]”. Segon lo jornal francés Libération, l’operacion contra Chrysi Avgi ajudariá a melhorar l’imatge del govèrn grèc, que prendrà la presidéncia de l’Union Europèa de genièr a junh de 2014.