Los ensenhaires son en cauma dempuèi tretze jorns contra las imposicions del Govèrn Balear e luchan per manténer lo catalan a l’escòla. Los organizaires parlan de 90 000 manifestants a Palma e de desenats de milièrs a Menòrca, Eivissa, Formentera e mai dins la rèsta dels Païses Catalans.

Las principalas vilas de las Illas Balearas venguèron ièr un clam massís contra la politica educativa del govèrn autonomic. De desenats de milièrs de ciutadans vestissián de camisetas verdas, simbòl de la revolucion del ensenhaires, e ansin manifestèron per carrièras contra las darrièras imposicions del govèrn autonomic del Partit Popular (PP) e la mesa en marcha del decret del Tractat Integral de las Lengas (TIL), que mesestima lo catalan dins l’educacion. Los organizaires an calculat aperaquí 90 000 personas a la manifestacion de Palma e mai de 100 000 dins totas las Illas Balearas. La Societat Baleara de Matematicas prepausèt de far un calcul precís, mas quora arribèron a 80 000 s’arrestèron de comptar. S’agís de la manifestacion mai nombrosa de l’istòria de las Illas Balearas.
 
 
Cauma indefinida dels ensenhaires
 
Fa tretze jorns que los ensenhaires de las Illas Balearas comencèron una cauma indefinida que ven cada jorn pus fòrta. D’ensenhaires, de sindicats e de parents d’escolans son decidits a manténer la protèsta contra lo decret sus las lengas del Govèrn Balear, òbra del president Bauzá, que refusa de ne negociar l’aplicacion. Dins aquestas doas darrièras setmanas, la cauma dels ensenhaires es venguda una mobilizacion sociala qu’a engatjat una part fòrça importanta de la societat de las illas e de totes los Païses Catalans. Los actes de solidaritat e los dons a la caissa de resisténcia dels caumaires son nombroses, de Perpinhan fins a Alacant. S’es acampat ja 220 500 èuros.
 
Fins ara, totas las convèrsas entre lo govèrn e los sindicats an mal capitat e l’Assemblada dels Ensenhaires a decidit de manténer la cauma indefinida, amb lo sosten dels parents d’escolans, que participan activament a la protèsta e ajudan economicament los ensenhaires.
 
Son estadas doas setmanas d’escòlas vuèjas e de carrièras plenas. La camiseta verda per la defensa de l’educacion publica, de qualitat e en catalan, es venguda una ondada de solidaritat. De protèstas popularas se son entendudas dins los divèrses actes institucionals al Parlament Balear, a l’Universitat e endacòm mai.