Berlusconi a tornat provocar una enòrma crisi de govèrn en Itàlia. Dissabte decidiguèt de retirar los cinc ministres que son partit aviá dins lo govèrn e mai de retirar lo sosten parlamentari.
 
La rason es que la setmana que ven, lo Senat votarà la siá expulsion e el perdrà l’immunitat parlamentària. Alavetz li caldrà complir la senténcia de quatre ans de preson per fraudariá fiscala. Pasmens ne compliriá solament un, e al delà seriá dins son ostal. Berlusconi condicionava son sosten al govèrn italian a que se reparèsse la siá situacion juridica.
 
Dimenge, lo primièr ministre italian, Enrico Letta, se reüniguèt amb lo president de la Republica, Giorgio Napolitano, per ensajar de redreiçar aquela situacion. Deman, dimècres, Letta se sometrà a un vòte de fisança per comprovar se ten lo sosten del Parlament. Pasmens a escartat la possibilitat de convocar d’eleccions nòvas.
 
Lo primièr ministre Letta qualifiquèt l’actitud de Berlusconi coma “l’òbra d’un òme fòl”. E anoncièt que demandariá lo sosten als autres partits del Parlament per evitar que l’actitud de Silvio Berlusconi tornèsse paralisar lo govèrn italian.