Los gravaires de trofèus d’Anglatèrra e d’Austràlia an una setmana per s’entraïnar a picar los noms novèls dels campions de Superliga e d’NRL. E òc, aqueste divendres de nuèit, aprèp cinc finalas ganhadas en sièis ans, Leeds poguèt res contra Wigan, mai viu e mai inspirat e que ganhèt la mièja finala: 22-12.
 
La velha, los Lops de Warrington mostrèron las dents e demostrèron qu’avián faita la bona causida amb la decision de reçaupre los Gigants d’Huddersfield que foguèron distanciats (18-10) tre la pausa, abans de tornar a 24-22 a quauquas minutas de la fin per pèrdre en definitiva 30-22. La finala inedita Wigan-Warrington se debanarà, a Old Trafford (Manchester), aqueste dissabte 5, a 7 oras de la nuèit (ora occitana).
 
En Austràlia, lo campion Melbourne aviá ja plegat la setmana passada fàcia a Newcastle qu’en mièja finala, aqueste dissabte, faguèt pas lo pes fàcia als Pols-Roosters de Trent Robinson, qu’èra l’an passat l’entraïnaire dels Dracs catalans: 40-14.
 
Divendres, los Lapinons marquèron dos ensags dins las dètz primièras minutas, puèi de minutas en minutas las aurelhas se faguèron de mai en mai pesugas e bassas, lo ritme de las corsas baissèt d’intensitat e las Aglas de mar ne profeitèron per s’impausar: 30-20. Finala doncas a l’ANZ Stadium (inutil de prene l’avion per Sydney: i a pas mai de plaças), aqueste dimenge 6 d’octobre, a 11h15 del matin (ora occitana), entre los Pols e las Aglas. Mèfi a las plumas e als plumatges!
 
Las finalas de Superliga e d’NRL son restransmesas en dirècte per BeIn Sport que serà tanben lo difusor unic de las partidas de la Copa del Monde per Occitània e Catalonha.
 
D’aquel temps, los Dracs preparan la sason venenta: Fakir e Paea an tornat signar alara que l’alièr Damian Blanch a anonciat que dintrava en Austràlia. Contra quauques 900 000 èuros, Wigan daissa partir son arrièr Sam Tomkins als New Zealand Warriors ont tocarà 476 000 èuros per an (es plan mens que lo Zlatan o lo Lionèl).
 
Dimars passat, a París, lo president Zalduendo e l’entraïnaire Richard Agar anoncièron los 24 jogaires retenguts per portar lo malhòt dels Pols per la Copa del Monde. Sens suspresa, 15 jogaires dels Dracs d’aquesta sason ne fan part. E suls 9 autres, gaireben totes an crosat lo camin dels Dracs a un moment o un autre, levat l’arrièr Soubeyràs (Carcassona) o lo jove Fages (titular a Salford). Se fa rampèl tanben a l’australian Clint Greenshields (seleccionable per aver disputat mai de tres sasons amb los Dracs). Un doblidat: lo dobertura de Carcassona Maxime Gressèque que serà, fin finala, passat a costat d’una vertadièra carrièra internacionala.
 
Una partida de preparacion es prevista lo divendres 18 d’octobre a Tolosa fàcia als Estats Units (veire aficha) abans lo primièr rescontre del 27 d’octobre a Hull fàcia als Papós.
 
Es mai qu’ora de reservar de plaças per las partidas d’Avinhon contra los Kiwis (1/11) e contra Samoa a Perpinhan (11/11).
 
D’aquel temps, se teniá la segonda jornada del campionat d’Elèit 1. Dissabte, Tolosa se mostrèt mai fòrta que Lesinhan 18-6 e Carcassona anèt ganhar, mas foguèt pas simple, fàcia a una jove e dinamica formacion d’Avinhon: 17-12. Dimenge, a Sant Estève, los Dragonets, aprèp aver menat 20-12, se fasián susprendre per Limós e lo còp del capèl d’Alexis Alberola: 24-20; del temps que Vilanuèva s’impausava dins las darrièras minutas fàcia a Palau que lor i manca encara lo darrièr quart d’ora catalan: 32-12.
 
La setmana que ven, dissabte, Carcassona reçauprà Tolosa, e dimenge, al Molin, Vilanuèva vendrà desfisar Lesinhan, Limós anirà a Palau e Avinhon afrontarà los Dragonets sus la pelena de l’estadi municipal de Sant Estève. L’Elèit 2 començava la sason a Montpelhièr per una dimenjada magica que vegèt una partida nulla entre Carpentràs e Vilafranca de Roergue: 18-18; e las victòrias d’Albi contra Lion: 40-14; de Montpelhièr contra Realmont: 18-10; L’Escura contra Tonencs: 23-16; Baó contra Tolosa-Broncos: 30-28; e Cavalhon fàcia a Sant Gaudenç: 29-16.
 
E per aver mai d’informacions sus nòstre espòrt benaimat, podètz anar gitar un uèlh sul sit Internet de la Federacion dins sa presentacion tota bèla, tota novèla.
 
 
 
 
Alan Roch