Almens 18 membres d’Herrira, un collectiu de sosten als presonièrs d’ÈTA, foguèron arrestats ièr per la Gàrdia Civila espanhòla, en seguissent las instruccions de l’Audiéncia Nacionala, un naut tribunal espanhòl excepcional. Dètz d’eles son estats detenguts pendent qu’èran en una reünion del collectiu.
 
Al delà d’aquelas detencions, an barrat 32 perfils de Twitter, 125 de Facebook e 38 sits web. An blocat tanplan los comptes bancaris de l’associacion. An escorcolhat las sedenças e l’operacion es encara en cors.
 
Tot aquò es arribat dos jorns après que lo Ministèri de l’Interior espanhòl respondèsse al darrièr comunicat d’ÈTA, en disent que solament acceptariá la dissolucion de la banda del temps que s’avertiguèt lo mond basquista que “legalitat vòl pas dire impunitat”.
 
Herrira (“al país”), es una organizacion que revendica que los presonièrs bascos sián en de presons del Bascoat, coma de fach o garentisson las leis espanhòlas. Ajudan los parents a viatjar fins a las presons. Tanben fan de manifestacions per aculhir los presonièrs que sortisson, d’omenatges a de presonièrs mòrts, d’afichas e de campanhas de pression e difusion. Son la continuacion d’autras associacions de sosten als presonièrs, illegalizadas pels govèrns espanhòls.