Lo procuraire de la Republica a Marselha indiquèt diluns de tantòst que reteniá la nocion de legitima defensa, après los còps de fuòc d’un comerçant contra un malfactor qu’èra vengut raubar dins sa botiga a 7 oras del matin.

Tres personas èran arribadas per raubar dins lo comèrci. Quand ensajavan de brisar la pòrta, lo gerent del Bar dels Pins auriá tirat contra un d’eles, amb un fusilh de balas de cauchó. S’agís de municions non letalas, qu’endacòm emplega la polícia antisusmautas e que pòdon provocar de feridas.
 
“La respònsa me sembla proporcionada a l’agression”, çò indiquèt lo procuraire segon La Provence. “Aquò me permetrà de remetre en libertat l’autor dei tirs. Considèri pas d’enseguidas còntra eu”, çò apondèt.
 
Lo comerçant tirèt contra un gojat de 17 ans, armat tanben d’un fusilh de pompa. Foguèt grèvament ferit mas lo poguèron sonhar sus plaça. La polícia es a cercar los autres dos complices.
 
Aquel acte arriba dins un clima fòrça tibat, amb una creissença excepcionala dels raubatòris a man armada, e après l’afar del joielièr de Niça que tuèt un jove bracaire quand fugissiá a l’endarrièr d’una mòto.
 
Ja i a una pagina Facebook de sosten al comerçant, e mai se serà pas jutjat. E, coma d’abitud, l’ultradrecha profiècha dels faches per semenar son discors d’asirança.