Diluns, dimars e dijòus passats, se debanèron de tèrratrems al sud de Catalonha e al nòrd del País Valencian. Los tèrratrems, de 3.4, 3.6, 3.9, 4.1 e 4.2 gras de l’escala de Richter, arribèron en seguida de las injeccions de gas del projècte Castor, qu’ensaja d’aprofechar lo gas d’un ancian potz de petròli a 1750 mètres jos la Mar Mediterranèa, davant la còsta de Vinaròs.
 
Lo projècte es gerit per l’entrepresa UGS, qu’a investit 1,2 miliards d’èuros. Injèctan de gas dins lo jaç per ne forçar l’extraccion, çò qu’a provocat, dempuèi lo 13 de setembre passat, aperaquí 300 sismes d’intensitat bassa, fins a aquesta setmana.
 
“Los sismes produsits per l’activitat del sit son a aumentar en frequéncia e intensitat”, segon Jonathan Gómez, del Collègi dels Geografes d’Espanha, qu’apond que lo risc de sismes i es encara, e mai se las activitats s’arrestèron temporàriament lo 26 de setembre. “Sèm davant una situacion non contrarotlada”, çò diguèt, “cal téner l’alèrta”.
 
 
Cal dire que dempuèi l’an 2007 i a de protèstas contra lo projècte Castor, mas alavetz los manifestants èran considerats alarmistas. Aquesta setmana las manifestacions e las protèstas contunhavan en essent mai nombrosas.