Lo govèrn de Gibartar a publicat un comunicat que denóncia una “campanha d’ostilitat fòrça grèva contra Gibartar e lo sieu pòble dempuèi Espanha”. Aquel comunicat planh, sustot, las acusacions falsas e irresponsablas que fan qualques ministres e nauts responsables de l’estat espanhòl contra Gibartar. Tanplan, qualques sectors de la premsa espanhòla contribuisson a exagerar aquelas acusacions falsas per crear un clima d’asirança contra Gibartar.
 
Concretament, lo comunicat denóncia de cases coma lo de la representacion teatrala d’una escòla, ont los escolans ocupavan simbolicament Gibartar e ne fusilhavan los abitants.
 
Lo govèrn gibartarenc ditz qu’es pas que lo darrièr exemple del clima que s’es generat en Espanha aquestas darrièras uèch setmanas. E denóncia qu’es un reflèxe de l’actitud negativa que l’estat espanhòl a fomentat contra Gibartar.
 
Lo comunicat remembra tanben los atacs contra de veïculs amb matricula de Gibartar, que son estats cremats del costat espanhòl de la frontièra, e tanben los insultes e las vexacions qu’an patit qualques ciutadans pel fach d’èsser gibartarencs.
 
E n’acusa lo govèrn espanhòl amb aqueles mots: “Aquelas reaccions son de la responsabilitat del govèrn espanhòl, qu’es lo principal responsable de las consequéncias de sas declaracions. Encara mai, lo govèrn espanhòl deuriá refusar e condemnar publicament lo vidèo amb totes los autres actes d’agression, ostilitat e difamacion que lo pòble de Gibartar a patits. L’estat espanhòl es tanben obligat, pels acòrdis internacionals, de metre en examen los cases d’expression d’asirança e los delictes d’òdi general.”
 
Fin finala, lo govèrn gibartarenc anóncia que collabòra amb un burèu d’avocats prestigioses per obténer las informacions necessàrias, per fin de far sa denóncia contra los ciutadans e contra las entitats espanhòlas responsablas d’escampar lo clima d’asirança envèrs Gibartar.