Almens 200 personas son mòrtas après lo naufragi d’una barcassa ont viatjavan aperaquí 500 immigrants qu’ensajavan d’arribar a l’illa de la Lampedosa, al sud de Sicília. Encara i aperaquí 150 despareguts e lo nombre de mòrts poiriá aumentar. Qualques 150 personas son estadas salvadas.
 
Demest los mòrts i a de mainatges e una femna prens. Demest los subrevivents del naufragi i a una persona que poiriá èsser lo trafegaire que los menava, qu’es estat detengut.
 
La majoritat d’eles venián d’Eritrèa e Somalia. Fasiá fòrça oras qu’èran en nauta mar e capitavan pas de téner lo contacte amb las autoritats per èsser salvats. Es pr’amor d’aquò que decidiguèron de far un fuòc, per poder èsser localizats, mas la barcassa s’es incendiada e an sautat dins la mar.
 
La consolessa de l’illa a manifestat sa tristor per aquela “tragèdia terriba”. “Pro! Qu’esperam? Qu’esperam mai? Es una orror continuala”, çò diguèt Nicolini per rapòrt a las arribadas constantas de barcas d’immigrants del nòrd d’Africa a la Lampedosa.
 
La consolessa a tanben declarat que quand los naufragièrs èran totes dins l’aiga, “tres vaissèls de pesca son passats e an contunhat lor camin sens los ajudar”. “S’aquò es vertat, o caldrà esclarzir”, çò apondèt.
 
La tragèdia s’es passada qualques oras après que se remorquèsse fins al pòrt de l’illa una autra barcassa amb 463 immigrants. Lo centre d’aculhença de la Lampedosa es aclapat d’òbra, dimècres i aviá aperaquí 700 personas.
 
Dempuèi lo començament de l’annada fins al començament de setembre, aperaquí 22 000 immigrants son arribats a las còstas de la Lampedosa, Sicília, Calàbria e Polha, segon de donadas de Save the Children Itàlia.