Mai de dos mila personas, segon La Montagne, prenguèron part ièr per carrièras, al centre de la vila de Clarmont-Ferrand, a una marcha blanca en memòria de Fiona, que sa maire e son bèlpaire an reconegut sa mòrt, dins sos 5 ans, après quatre meses de messòrgas.
 
Lo paire de la drolleta, amb son avocat, participèron a la marcha, que desfilava darrièr una bandieròla mostrant doas fòtos de la petita e la mençon “Tots ensems per retrobar Fiona”.
 
Lo cortegi respondiá a una crida lançada dins Facebook, e la majoritat dels participants manifestèron que se sentián traïts, un sentiment “qu’es normal quand cercham pendent quatre mes una drolleta, quand vesèm qu’a una maire que plora davant los jornalistas”, çò disiá una de las organizairas de la marcha a L’Indépendant. “[Pasmens] sèm pas aicí per jutjar qual que siá, ni far los enquestaires. Los jutges jutjaràn”, çò apondèt, en refusant “tota crida a la venjança o a l’asirança”.
 
Lo 25 de setembre, la maire de Fiona, Cécile Bourgeon, confessèt a la polícia que sa filha foguèt tuada per son companh, Berkane Maklouf. Fins alavetz Bourgeon aviá assegurat que sa filha aviá desaparegut quand jogava al Pargue de Montjuset de Clarmont-Ferrand, lo 12 de mai passat.