Un jove polonés, Piotr Piskozub, moriguèt de fam dimècres passat dins sos 23 ans dins una albèrga de Sevilha, mentre qu’esperava assetat al costat de la coa ont se repartissiá lo dinnar de caritat.
 
Dimars de ser, Piskozub demandava quicòm per manjar a la pòrta d’un restaurant de manjar rapid de la capitala andalosa. Tombèt malaut al sòl e qualques vesins telefonèron al servici d’urgéncias medicalas. Foguèt, fin finala, menat a l’espital Virgen del Rocío a mièjanuèch e mièja, mas a 2h05 li donèron l’exeat, e mai se lo jove pesava 30 quilos. Foguèt menat alavetz a un centre d’aculhença municipal ont li donèron lo sopar e un luòc per dormir. L’endeman moriguèt en fasent la coa per lo dinnar. Lo tribunal numèro 5 de Sevilha es en carga de l’enquèsta.
 
De fonts oficialas dison que moriguèt de broncopneumonia, e mai se la conselhièra municipala en carga dels afars socials, Dolores de Pablo-Blanco, parla de “desitratacion e malnutricion” e qualifica l’eveniment coma “un malaürós cas extrèm”. Lo primièr cònsol de Sevilha, Juan Ignacio Zoido, confirmava tanben que lo jove èra “completament malnoirit e desidratat”, planguèt l’afar e soslinhèt qu’a la sortida de l’espital foguèt menat al centre d’aculhença e que la municipalitat faguèt tot çò que caliá.
 
Los responsables del centre d’aculhença vòlon pas parlar als mèdias sus l’eveniment. Planhon que la version oficiala es “tergiversada”, e remandan a la version de la municipalitat.
 
De son costat, la conselhièra autonomica de la santat e las politicas socialas, María José Sánchez Rubio, defendèt l’accion dels servicis sanitaris andaloses (SAS). “Aquela persona èra per carrièras, se portèt mal, lo menèron a l’espital, lo sonhèron, respondèt ben al tractament e quand se portava melhor lo menèron a l’albèrga e lai moriguèt”, çò diguèt la conselhièra andalosa.
 
En Polonha se planh tanben aquel eveniment talament tragic.
 
Un usatgièr enregistrèt Piskozub en vidèo al moment que se constatèt que lai èra mòrt. Aqueles imatges son estats difonduts pels mèdias espanhòls.